uMthunywa
Thokozile Mbedzi
ZITSHWAQILE izakhamizi zelokitshini leMagwegwe kulandela ukufa komphathisikolo weTennyson Hlabangana High School okubikwa uzibophele.
Tennyson Hlabangana High School
Umuyi, uMnumzana Lwelizwe Edison Bhebhe, obeleminyaka engu-30 yokuzalwa, uzibophele emzini kamfowabo lapho atshiye incwadi elomlayezo wokuthi impilo isimehlule.
Amapholisa abike ngalesi sehlakalo.
“Amapholisa akoBulawayo adingisisa ngodaba lokufa ngokuzibophela olwenzakale eMagwegwe mhlaka 30 Nkwenkwezi. Umufi nguLwelizwe Edson Bhebhe, oleminyaka engu-30 yokuzalwa obehlala eLobengula Extension obengumphathisikolo eTennyson Hlabangana High School,” kutsho isikhulumi samapholisa koBulawayo u-Inspector Abednico Ncube.
uInspector Abednico Ncube
“Umufi wavakatshela umfowabo eMagwegwe mhlaka 28 Nkwenkwezi wathola kungela muntu endlini, kodwa wahlala. Mhlaka 30 Nkwenkwezi ngehola lesikhombisa ebusuku, umfowabo wafika endlini wathola umzimba kamufi phansi ulentambo entanyeni. Enye intambo yayilenga ephahleni.Watshiya incwadi ebika ukuba yena wehlule isikolo. Umfowabo wabikela amapholisa eMagwegwe.”
U-Inspector Ncube ukhuthaze uzulu ukuthi nxa elenkinga abikele abaphathi bezigaba, abafundisi, loba amapholisa ngoba ukuzibulala akulungisi lutho.
Ekhuluma lentatheli kaMthunywa uMnumzana Khangelani Moyo weMagwegwe uthe bathithibele ngokufa kukaMnu Bhebhe.
“UMnumzana Bhebhe ubengumuntu obeqeqetshile njalo engumphathi. Kusethusile ukuthola ukuthi uzibophele. Incwadi le ayitshiyileyo isehlule ukuthi siyizwisise.”
