uMthunywa
Cornelius Luphahla
KULENDODA yesabelweni seMabobolo eBinga etshiye inkundla kasobhuku wakule indawo ingelankani ngemva kokuba ithe okwenza yathandana lomfazi wesinye isakhamuzi yikuthi upheka utshwala obumnandi kakhulu.
Indaba le yenzakale ngoMgqibelo kuviki ephelileyo lapho uMnumzana Livion Ndlovu abikele khona inkundla kaMnumzana Albert Mudimba ukuthi okwenza wathandana lomkaMnumzana Polite Dube, uNkosazana Jesca Nyoni yikuthi upheka utshwala obumnandi kakhulu.
UMthunywa uxhumane loNkosazana Linda Moyo oyisakhamuzi sakule indawo wathi yena wezwa esebizwa ngusobhuku koDube wathola uDube ebophele uNdlovu embhedeni ethi umthole lomkakhe.
“Mina ngathi ngivuka ekuseni ngabona umntwana ezongibiza ethi usobhuku uyangibiza. Ngathi ngifika ngathola abanye abajulisi bakasobhuku okuyikho asitshela khona ukuthi usibizela ukuba sizobona uNdlovu obanjwe nguDube elomkakhe.
“Okwangimangalisayo yikuthi uNdlovu wayebotshelwe embhedeni nguDube sathi sesimbuza ukuthi umbophele nini wathi umbophele ngesikhathi emthola ntambama ngemva kwalokho samkhulula,’’ kutsho uNkszn Moyo.
Ekhuluma lentatheli uMnumzana Albert Mwembe oyisakhamuzi sakule indawo uthe kuliqiniso ukuthi uMaNyoni upheka utshwala obumnandi njalo yena wayengazi ukuthi uthandana loNdlovu kodwa kwakukhona ayekusola.
“Kuliqiniso sibili ukuthi umkaDube upheka utshwala obumnandi njalo utshwala bakhe awungeke uzwe kuthiwa mhlalokho ubukhuthile. Noma kunjalo mina ngangingazi ukuthi uNdlovu uthandana loMaNyoni kodwa ngangihlala ngibona nxa kulotshwala koDube uNdlovu obakhe babungapheli esikalini.
“Ekuqaliseni ngangithi mhlawumbe uthenga kakhulu kodwa ngaze ngacina sengimangala ukuthi uyabe eyithethe ngaphi imali yokuthenga nsukuzonke njengoba engasebenzi,’’ kuchaza uMnu Mwembe.
Ebuzwa ngale indaba uNkszn Nyoni uthe uzwa ubuhlungu ngoba umuzi wakhe usuchitheka wabuya wathi ngeke abalise okunengi.
“Mina ngizwa ubuhlungu kakhulu ngesiga esingehleleyo ngoba umuzi wami usuchitheka ngakho ngeke ngikhulume okunengi ngendaba le ngisakhangele ukulungisa okomuzi wami. Ungakhiphi indaba le kuphephandaba ngoba uzangichithela umuzi,’’ kutsho uNkszn Nyoni.
Usobhuku wakule indawo uMnu Mudimba uthe indaba le uyayazi njalo ukhangelele ukuthi ayidlulisele phambili.
“Indaba kaNdlovu obanjwe emzini kaDube elomkakhe ngiyayazi sibili ngayithonisa kodwa ngikhangelele ukuthi idlulele phambili ngoba mina kangigwebi muntu kugweba umlisa lenduna,’’ kuphetha uMnu Mudimba.
