uMthunywa
Thokozile Mbedzi
KULOMDLALI webhola weBinga obulewe ngomunye umdlali kulandela ukutshaywa ngesitina ekhanda, uMthunywa ukuzwile lokhu.
Kuvele ukuba uSimbarashe Sibanda oleminyaka engu-24 yokuzalwa wesiqintini seNalubuyu, ngaphansi kwenduna uBinga, esigabeni seBinga utshaye omunye umdlali, uPlanner Munenge ngesitina ekhanda wafa ngesizatho esingasatholakalanga.
UMthunywa uzwe ukuthi mhlaka 10 Mpandula kwakulemidlalo yebhola endaweni yamabhizimusi yeDonga, eBinga lapho iqembu lesigabeni seNalubuyu elalidlala khona.
Kuvele ukuba ngenxa yokuba imidlalo yaphuza ukuphela abaqondisi beqembu leNalubuyu basebenquma ukuthi balale kule indawo bahambe ekuseni.
Kubikwa uPlanner Munenge labanye basuka baya ebhawa bayozinathela utshwala. Bekhonale kwaba lokungazwanani phakathi kwakhe loSimbarashe Sibanda oleminyaka engu-24 kodwa amanye amalunga eqembu akhulumisana labo umsindo waphela.
Ekuphendukeni kwabo lapho okwakuthiwe bazalala khona ngehola lika 11 ebusuku, kubikwa uSimbarashe wadobha isitina watshaya uMunenge ekhanda wahle wawela phansi wafa.
Indaba le yabikelwa amapholisa afika kule indawo ukuze azochwayisisa.
Isikhulumi samapholisa esabelweni seMatabeleland North uInspector Glory Banda uqinisekise ngendaba le.
uInspector Glory Banda weMat north
“Samukele udaba lomdlali otshaye omunye ngesitina wafa ngemva kwemidlalo ababe layo eBinga. Ababili laba baba lokungazwisisani ngodaba olungazange luvezwe.
“Ekuphendukeni kwabo lapho ababezalala khona uSibanda yikho ajikijela khona uMunenge ngesitina wawa abanye bazama ukuba bamsize kodwa kwehlula,” kutsho uInsp Banda.
Uphethe ngokuxwayisa uzulu ukuthi nxa kulokungezwani abantu kabadinge abangabasiza ukuthi bakhumisane umlotha.
“Sixwayisa abantu ukuthi baqakathekise impilo. Sikhuluma nje amacala okubulalana asemanengi esigabeni seMatabeleland North kungakho sikhuthaza abantu ukuthi badinge abangabancedisa ukuthi bakhumisane umlotha,” kuphetha uInsp Banda.
