uMthunywa
UKUBULALANA abantu sebekubona kuyinto encinyane engatsho lutho kukanti impilo yisipho esikhulu uNkulunkulu asipha sona njengabantu. Sekulamaviki ambalwa amaphephandaba ebika njalonje ngendlela abantu endaweni ezehlukeneyo ababulalana ngayo. Kuyadanisa ukuthi abanye balaba abantu babulala abanye ngenxa yothando lwenotho.
Angithi nje iBhayibhili elingcwele liyakufakaza ukuthi uthando lwemali luyimpande yesono. Umuntu kumele asuthiseke ngalokho alakho empilweni kuthi nxa engasuthiseki asebenze nzima ukuze adle izithukuthuku zamandla akhe.
Indaba lezi ezihlasimulisa umzimba esizifunda phose nsukuzonke kumaphephandaba ngeke sahlangana lazo nxa sonke singafunda ukuzisebenzela.
Phakathi kwalezi indaba ezihlasimulisa umzimba, sibale ngejaha lakoJindu elibulele umngane walo lamcuya izitho ngoba lithenjiswe imali engange$20 000 kanye leToyota Quantum ngenye inyanga.
Kukanti njalo kuphephandaba lethu lakuyonale iviki silodaba lomunye uwindi ovuke umhlonga ngempelaviki elokitshini leMakokoba wagwaza abantu abangu-7. Labobantu basesibhedlela njalo omunye ukhutshwe ilihlo kukanti abanye basesimeni esibi.
Kambe umuntu ukuze enze isenzo esifana lalesi uyabe engenwe ngumoya bani? Kutsho ukuthi lomphefumulo womuntu kawutsho lutho kuye.
Okusuka kujinge uzulu aswele lempendulo yikuba luwindi lababantu ayebagwaza babengamenzanga lutho. Kubikwa abanye balabo abagwaziweyo bebezama ukulamula yena abesebaxhonxa ngalingqamu yakhe.
Ngumoya bani osusenza abantu bangabi lomzwangedwa ekulimazeni lekubulaleni. Nxa kuyimali edingakalayo iyasetshenzelwa bakwethu, etholakale lula kayihlali.
Sitshayela amapholisa akithi ihlombe ngoba kundaba ezinje benza umsebenzi wabo ngobunono obukhulu. Ngoba ngazozonke izikhathi ngemva kwensukwana nje ezimbalwa sizwa ukuba labo abadale amacala sebesezandleni zabo.
Kuyadingeka njalo ukuthi amabhawudo abotshwe aqine ikakhulu nxa abantu bephiwa amacence emibhobho ngoba yizo lezi izikhali ezicina zisetshenziswa ukubulala abantu abangelamacala.
Kungumbono waleliphephandaba ukuthi nga uzulu uyaxekana lokuchitha umphefumulo mahlayana kodwa azame ngazo zonke indlela ukukhumisana umlotha ngoba kuyinto enhle kakhulu njalo eyakha isizwe.
