uMthunywa
SINGAKHALA izinyembezi zegazi, sikhonone size sizibhuqe phansi njengosapho lweZimbabwe sithi amaZimbabwe wonke aphakathi kwelitshe lembokodo kulezinsuku kodwa-ke ngubani ongafakaza ethi ngempela wonke umuntu uyasokola.
Phela likhona ihlekana labosomabhizimusi, abadla besesulela phansi abangakwaziyo ukuthi ukuhlupheka vele kuyinyamazana ekhangeleka njani, bakuzwa ngendaba kuphela. Kwesinye isikhathi kucina kukhanya sengathi abadubekayo badubeka ngamandla kukanti abaphumelelayo labo baqhubeka kubahambela.
Phezu kwazo zonke inhlupho esikhangelane lazo kulezinsuku ezithi ukukhuphuka kwentengo yezinto, ukuthola iholo eliphansi, ukuswelakala kwabodokotela ezibhedlela sibelethane njalo lolunye uhlupho lokuswelakala kwemali emabhanga.
Ngeviki ephelileyo kukhitshwa imali entsha uzulu wajabula kakhulu ethi mhlawumbe udubo lokusilela kwemali emabhanga soluzakuba nganeno kanti ngitsho nanko phela waphinda wadana esizwa ukuba kulamaqubaquba emali abonakale ezitaladeni emali entsha.
Akusamangalisi ukubona abantu bethenga imali kubosiphatheleni ukuze benelise ukuthenga impahla etshiyeneyo kulabo abathengisa impahla phandle ngoba intengo yakhona ingcono kuleyaphakathi ezitolo.
Kuyadingeka ukuba ibhanga lesizwe eleReserve Bank of Zimbabwe liqinise imithetho yokuthathwa kwemali emabhanga ukuze kungabi ngitsho lelilodwa eligobisa umthetho wokukhitshwa kwemali. Kungenzeka njalo ukuba bakhona abanikwa imvumo yokukhipha imali kodwa bacine beyisebenzisa ngendlela engayisiyo abayithathele yona.
Lokhu kungenziwa ngendlela eqondileyo kuzaqeda isifo esesiphambanise ilizwe lethu sobugwelegwele obuyibo osobuphambanise ukuthuthuka komnotho welizwe lethu.
Nxa kungabotshwa amabhawudo ngeke abantu babone angathi lokho okwakutshiwo nguMphathintambo obona ngeZezimali kanye Lokuthuthukiswa Komnotho uMthuli Ncube ukuba kuzakuba nzima kungathi kwakutshiwo kuhlekana elithile. Kuyadingeka ukuba sonke njengezizalwane zakuleli sibambisane ukuze silwise ububi obuyibo obuphambanisa imizamo kaHulumende yokuvusa umkhonomi welizwe lethu.
UHulumende kumele abuye loswazi kujeziswe bonke abaphambanisa ukuthuthuka komkhonomi welizwe.
Kungumbono waleliphephandaba njalo ukuthi ibhanga lesizwe kumele lilandelele wonke amabhanga ngoba ukuvela okwenziwa ngamabhanga amabili kuyikuvulwa kwamehlo alokhu okwenzakala emabhanga aselizweni lakithi. Aluba bengahlala bevule amehlo okhozi ubumenemene bonke obenzakala emabhanga bungaphela du.
