uMthunywa
KULEZINSUKU sihlala sisizwa ngokuziphatha kwabokhekhe okusethusayo thina njengabadala. Kukhanya abantwana sebefunda imikhuba emibi, lokhu kubangelwa yikuthi bafuna ukulingisela impilo yakumabonakude. Kulemicimbi yabo le abayibiza ngokuthi ngama Vuzu Party lapho abenza konke okubi ongakucabangela njalo lokhu kuyadanisa impela. Abanye ngasebethengiselwa izidakamizwa ezitaladeni ezikolo kanye lasemalokitshini osekusenza bahlale bedakiwe. Abasazili lutho abantwana, sebehlala bedinga bona “ongoma” ukuze batshone bedakiwe.
Okubuhlungu yikuthi utshwala kanye lezidakamizwa kulemithelela emibi elakho ukwenza ikusasa labantwana lingabi ngelilokukhanya.
Kutshayisa ngovalo ukuthi abantwana laba abancane sebeganga ngalindlela yiloba besesikolo. Yebo abantwana bayaganga kodwa-ke osekusenzakala lokhu kunyampisa inhliziyo njalo kungabe kutshengisela ukuthi kukhona lapho okuyekethiswa khona ekukhulisweni kwabo.
Kungenzeka kube kuyikuyekethisa kwabazali ngekhaya kumbe njalo kwababalisi ezikolo. Abazali lababalisi balomlandu omkhulu ekukhulisweni kwabantwana belomthetho.
Kuyadingeka ukuba abazali kanye lababalisi babophe ziqine ukuze bafundise abantwana indlela eyiyo okumele bahambe ngayo ngoba phela umthwentwe uhlaba usamila njalo lesigogo sigoqwa sisemanzi. Kungumlandu wababalisi kanye labazali ukuthi bafundise abantwana ngobubi bokunatha utshwala kanye lokusebenzisa izidakamizwa.
Kulezinsuku ngomthetho okhona siyazi ukuba kunzima ukuthi abantwana batshaywe kodwa uswazi lungaswelakala empilweni yomntwana kakulanto enhle ephumayo. LeBhayibhili elingcwele likubeka mgceke ukuba nxa ugodla induku emntwaneni uyamzonda ngoba uswazi yilo olukhipha ubuwula empilweni yakhe.
Kungumbono kaMthunywa ukuba abazali kanye lababalisi babambisane ekukhuliseni abantwana ngendlela eqondileyo ngoba kuyibo abakhokheli bakusasa. Akuthandabuzwa njalo kusegcekeni ukuba nxa bengasakhuliswanga ngendlela eyiyo lekusasa labo liyafiphala.
Kuhle njalo ukuba labo abanatha utshwala babone ukuba nxa besenza lokhu abakwenzi emehlweni abantwababo ngoba bona bayabe befunda, besebekwenza ngoba bekholwa ukuba kuqondile ngenxa yokuthi kwenziwa ngumuntu omdala. Kubalulekile ukuba umzali munye ngamunye abone ukuba uyavikela umntwana wonke nje jikelele ukuze angaphanjaniselwa ikusasa lakhe.
Sitshiyela njalo abomthetho ingqobe ukuba babophe abathengisela utshwala ezindlini ngoba kuyibo abathengisela abantwana. Kungumbono njalo waleliphephandaba ukuba bonke abatholakala bethengisa izidakamizwa kanye lotshwala okungekho emthethweni bathole izijeziso ezifaneleyo ngoba ngenhloso yokuthola imali bacina bethengisela abantwana utshwala khona kungekho emthethweni.
Abantwana kumele bavikelwe ngazo zonke izikhathi.
