uMthunywa
KULEZINSUKU abantu abanengi bayakhala ngokusilela kobuntu kanye lokwehluleka ukulandela imikhuba lamasiko abantu abansundu. Kulezizatho ezinengi ezenza abantu beyise kumbe bakhangelele phansi imikhuba kanye lamasiko, izizatho lezi zigoqela ukulandela okwenziwa ngabantu bezizweni.
Njengesibonelo, kusukela endulo kulemikhuba okhokho bethu ababeyilandela nxa kubekwa umuntu oyabe esedlule emhlabeni njengokuthi abantwana kanye labantu abazithweleyo babengavunyelwa ukubona isidumbu njalo labantwana babevele bengavunyelwa esililweni.
Lamhlanje sokuguqukile, uthola abantwana abancinyane bebona isidumbu. Izenzo ezifana lalezi zenza abantu babone sengathi ukufa ngumdlalo kukanti ekadeni kwakuhlonitshwa ukufa njalo kusenziwa lemikhuba ukuze kungaphangi kuphenduke emulini leyo.
Kungumbono waleliphephandaba ukuthi yikuhlukuluza abantwana abalokhu bengaphansi kweminyaka esemthethweni ukuthi babone isidumbu ngoba lokhu kuzahlala isikhathi eside emikhumbulweni yabo. Yebo bakhona abanye abangaveza izizatho ezitshiyeneyo ezenza bafise labobantwana babone isidumbu kodwa-ke lo ngumkhuba ongeke wagqugquzelwa.
Ukufa yinto engajayelekiyo ngoba kungaze kwenzakale nsukuzonke kodwa kuhlezi kubuhlungu kulabo abalahlekelwayo.
Endulo abantu babehloniphana kakhulu; omncane ehlonipha omdala kuthi laye omdala ahloniphe omncinyane kodwa sokuguqukile kulezinsuku, abatsha kabasabahloniphi ngitsho abadala. Yikho nje bengasahloniphi ngitsho lempahla yabo. Abanye sebethatha nje impahla yabazali babo loba eyabadala bayeyithengisa kumbe benze abakufunayo ngayo. Kuyadanisa ukuthi ubuntu bethu njengoMthwakazi sesabuphosela koHela njalo sengathi kasisoze siphinde sibubone. Kuhle ukuthi njengabantu sihloniphane thina ngokwethu njalo sihloniphe lempahla yabanye bethu.
Kule iviki iphephandaba lethu limumethe udaba lwenina leMzilikazi elixabane lomakhelwane walo kubangwa isihlahla okubangele ukuthi ligamule leso sihlahla.
Kubikwa ngemva kokuganyulwa kwaleso sihlahla umninisihlahla uqaleke wafa. Kungenzakala ukuthi isihlahla leso besingcolisa ngempela iguma lakhe kodwa isenzo esifana lalesi kasiqondanga. Umakhelwane lo bekumele akhulumisane lomninisihlahla abe nguye ozigamulela isihlahla sakhe. Isenzo sakhe sitshengisa ukuthi ubengahloniphi “impahla” kamakhelwane wakhe njalo kuveza ukuthi njengabantu abansundu sesilahlile ubuntu bethu. Nangu lumakhelwane ungene emzini kamakhelwane wakhe wayagamula isihlahla leso.
Kuyadingeka ukuthi njengabantu abansundu silandele imikhuba yethu ngoba ezinye izihlahla zilemikhuba okumele yenziwe nxa zifika kuzigaba ezithize.
Kungumbono waleliphephandaba ukuthi lanxa bekhona abathi umhlaba uyaphenduka kodwa okuqakathekileyo yikuthi silondoloze amasiko kanye lemikhuba yethu njengabansundu ngoba yiyo eyenza sibe lobuntu obuyibo okumele siziqhenye ngabo. Ukuze kuthiwe singuMthwakazi yimikhuba lamasiko ethu.
