uMthunywa
KUYINTO ebuhlungu kakhulu ukuthi kulezinsuku abantu sebebulala ilizwe lethu ngokuphatheka ebuqilini obutshiyeneyo.
Yebo kungabe kuliqiniso ukuthi izinto zonke sezinzima lapha elizweni lethu ngenxa yokusilela kwemali, kodwa lokhu akutsho ukuthi ukuze umuntu athole ukuziphilisa kumele enze ubugwelegwele.
Phela kulezinsuku phose wonke umuntu ulakho akwenza ensitha okungaphandle komthetho njalo lokhu kutshengisela ukuthi ngempela abantu sebephambanisekile. Akusamangalisi ukuzwa kuthiwa isisebenzi esithile sibanjwe sisenza okungekho emthethweni esebenzisa ibizo lenkampani ayisebenzelayo.
Kulezisebenzi zekhansilini yeHarare ezimiswe umsebenzi kuyonale iviki ngoba zikhweze intengo yempahla esetshenziswa ukulwisa umkhuhlane we-cholera zisenzela ukuthi zitshayele esikhewini imali eyanikezwa yinkampani ye-Econet. Ubuqili obebusenziwa yizisebenzi lezi butshengisa ukuthi izisebenzi lesi zidonsela emuva umsebenzi wabakhokheli belizwe wokulwisa i-cholera esibulele abantu abangu-30.
Ngempela inengi labantu selicabanga ngokuziphilisa ngokwephula umthetho njengoba izinto ezinengi sezibiza imali enengi kakhulu.
Abanye sebengabatshontsha impahla yemsebenzini, abanye njalo ngabakhweza intengo yempahla besenzela ukuthi batshontshe imali njengalokhu okwenziwa yizisebenzi zekhansili yeHarare. Kuthi-ke abanye labo sebephila ngokuzidlela imali zemsebenzini.
Kambe Mthwakazi abantu bangabe sebengenwe yini bengcolisa ilizwe lethu?
Kuyadingeka-ke ukuthi njengoba iPhalamende isivuliwe njalo uMongameli welizwe uKhomuredi Emmerson Mnangagwa usecande indlela okumele iKhabhinethi entsha isebenze ngayo nanko phela kudingeka ukuba ugatsha lunye ngalunye lube lamaphurojekithi amahlanu azathuthukisa uzulu. Kukhangelelwe ukuthi ngalindlela abaphathintambo baveze sobala asebekwenzile kuKhabhinethi kukanti lokhu okuyabe kuvunyelwene kumele kubikelwe uzulu maviki onke ngoLwesithathu.
Kuyadingeka ukuthi njengoba uHulumende eseveze ukuthi ufuna kube lenguquko elizweni kusiyaphela insuku ezilikhulu asibambaneni njengezizalwane zakuleli sisebenze ndawonye siphakamise umkhonomi welizwe lethu.
Kungaba kuhle nxa umuntu wonke angazipha umlandu wokuthi alungise ilizwe lethu, sibulale imvukuzane yobugwelegwele ebisingene kuleli. Akusoze kubelula ukuthi sithole ukuhlala kuhle ngokuphangisa kodwa kudingeka ukuthi sizimisele ukulwisana lobubi obenzakalayo.
Kambe angithi sonke nje singazama ukuhamba ngendlela eyiyo izinto zingalungiseka siphakamise ilizwe lethu.
Kungaba kuhle singabambana ukuze sakhe iZimbabwe yethu ukuze abantu baswele ulutho olubi lokukhuluma ngathi.
