uMthunywa
ISIMEMEZELO sikaMongameli welizwe uMnangagwa sokuba abantu bahlale ezindlini okwensuku ezingu-21 ukuze bavikelwe kugcikwane le-Corona oluqhutshwa ngamazwe atshiyeneyo lulinyathelo elihle kakhulu ukuze kuvikelwe ukufa kwabantu.
I-Covid-19 ngumkhuhlane omemetheka masinyane endaweni elabantu. Emhlabeni wonke jikelele sokulabantu abedlula i-600 000 asebehlaselwe ngumkhuhlane lo njalo phakathi kwabo kulabafika 30 000 asebulewe ngumkhuhlane lo.
Kuleli kulabantu abayisificaminwe mibili asebetholakale ukuthi balegcikwane leli njalo sokufe oyedwa.
Ngenxa yokuba umkhuhlane lo ungumqedabantu, uMongameli welizwe umemezele ukuba kusukela mhlaka 30 Mbimbitho kusiya kumhlaka 19 Mabasa abantu kumele bahlale ezindlini bangayi emisebenzini ukuze kwenqatshelwe ukumemetheka komkhuhlane lo.
Inhlolisiso esezenziwe yilabo ababona ngezempilakahle ziveza ukuba phakathi kwensuku ezingu-21 umuntu ongabe eselomkhuhlane lo uyabe eselezibonakaliso zawo njalo kulula ukuba athathwe asiwe lapho okwelatshwa khona labo abalegcikwane leli.
Kubalulekile ke ukuba abantu balandele isimemezelo sikaMongameli lesi ngoba sihlose ukuba kwenqatshelwe ukuthi kucine kulabantu abanengi ababa lomkhuhlane lo ngenxa yokungalaleli.
Sincoma ugatsha lukaHulumende lwezempilakahle ngokwenza konke okusemandleni alo ukuthi kwenqatshelwe ukumemetheka komkhuhlane lo ngokuhlola abantu abangena bevela emazweni atshiyeneyo asehlaselwe yilo umkhuhlane ngoba kuyiyo indlela yokuthi bavikele uzulu kumkhuhlane weCovid-19 ongabangela ukufa.
Kungakho-ke njengephephandaba likazulu sithanda njalo ukuba sigcizelele isimemezelo sikaHulumende ukuba abantu kabahlale ezindlini bangavakatshelani njalo balandele izixwayiso zokuhlanzeka esizixwayiswayo zokuba sigeze izandla ngamanzi alesepa agelezayo, loba sisebenzise imithi ebulala amagcikwane, singabambi amehlo, amakhala kanye lomlomo lokuvala umlomo nge-tissue loba ngengaphakathi yendololwane nxa ukhwehlela loba uthimula.
Kukhangelelwe ukuthi insuku lezi zisiyaphela bonke abangabe sebelomkhuhlane lo babe sebebonakele njalo sebevakatshele ababona ngezempilakahle.
Kukanti umkhuhlane we-Covid-19 kubikwa umemetheka kakhulu ebantwini abalamasotsha omzimba angaqinanga, asebekhulile kanye labalezinye izifo ezifana letshukela, iBP lowenhliziyo njalo igcikwane lomkhuhlane lo liba semoyeni okutsho ukuthi olomkhuhlane lo angakhwehlela kumbe angathimula ulakho ukuthelela ongelawo oseduzane kwakhe.
Kungumbono waleliphephandaba ukuthi njengoba uHulumende esethethe inyathelo lokuqala lokuvikela ukumemetheka komkhuhlane lo kungumlandu njalo wethu sonke ukuthi sibone ukuba siyalandela lezo zixwayiso.
