uMthunywa
Thokozile Mbedzi loJoel Ndlovu
“Induna yethu ngeke idelelwe ngutitsha. . . ,” kutsho izakhamizi zakoSiyoka eBeitbridge.
Kubikwa zidla amalahle izakhamizi zakulindawo ngombalisi owasukela induna uSitaudze, uDavid Mbedzi wayithethisa phambili kwabantu.
Iphephandaba likazulu lithole udletshana lokuba ngoLwesithathu kuliviki kubeyisiphithiphithi esiqintini sakoSiyoka lapho izakhamizi ezitshengisele ngolaka esikolo seMajini Primary zifuna ukuthi umbalisi lo ajeziswe kumbe axotshwe umsebenzi.
Njengokubika kwephephandaba likazulu ngomnyaka odluleyo, utitsha lo, uMnumzana Velempini Hondo Sibanda wathethisa induna uSitaudze emdlalweni wezikolo eyitshela “okwakhe” esithi ayazi lutho ngezemidlalo.
Lokhu akuzange kuphathe kuhle izakhamizi ezingaphansi kwenduna, okwenze ukuba zikhononde ngesenzo salumbalisi kuliviki.
UMthunywa uzwe ukuba abazali basukumele phezulu ngemva kokuthola ukuthi kuleziphathamandla zemahofisini kaHulumende ezivakatshele koSiyoka zizohlolisisa udaba.
“Sivukele khona ukuyabatshengisela ukuthi umbalisi wabo uyadelela. Induna yethu angeke idelelwe ngutitsha,” kutsho isikhamuzi sakulindawo esifakaza ngodaba.
“Sizotshela izikhulu zemfundo ezivela eBeitbridge ukuthi isisebenzi sabo lesi siphula inhliziyo zethu ngokulwa lenduna yethu. Inhliziyo zibuhlungu. Icala leli ngelimangalisayo kusiko lethu.”
Ekhuluma lentatheli kaMthunywa uMnumzana Tikhathali Moyo, ongezinye zezakhamizi ebezithe gwaqa esikolo, uveze ukuthi bacaphuke kakhulu njalo bazizwa benqunu ngoba isenzo sika-Velempini Hondo singaphazamisa impilakahle esigabeni.
“Angeke sivumele into enje. Thina njengezakhamizi zakulindawo lapha okufundisa utitsha lo asithabanga lakancane. Inhliziyo zethu zibuhlungu ngesenzo sikaMnu Velempini ngoba weyise amasiko ethu. Lihlazo leli esilenzelwe ngumbalisi lo. Ufundisani abantwabethu?
“Silapha siyatshengisela ngoba siveza inhlungu esilazo njengezakhamizi ezikhokhelwa yinduna.”
Uqhubeke njalo esithi udaba lolu baluhambisa kubaphathi bezikolo ngoba bayahlonipha umthetho.
“Udaba lolu saluhambisa kubaphathi bezikolo ngoba sihlonipha umthetho ngakho kumele babone okokwenza ngesiqhatshwa sabo ngoba lapha asimfuni ngitsho lakancane.
“Lokhu yikho okusenze sasukuma phansi ukuzotshengisela ukuthi asithabanga. Nxa uVelempini edelela amasiko, kutsho ukuthi lathi usibona singebantu phela,” kulandisa uMnu Moyo.
Imizamo yokukhulumisana lombalisi lo uVelempini yehlule, ucingo belungadojwa. okuveze ukuthi uyesaba ukufakaza ngodaba.
Induna uSitaudze lomphathisikolo waseMajini Primary kubikwa ukuba baphakathi kokuhlaziya inkemenkeme le emhlanganweni labaphathi bezemfundo.
Umlisa walindawo ebuzwa ngodaba lolu uthe abantu bethule udaba lwabo kubakhulu bezemfundo ngakho bazamelela impumela ngemva kokuba sebelungisile.
“Izakhamizi zethule udaba lwazo kuziphathamandla zemfundo ngakho sizamelela impumela yaloludaba ngemva kokuba sebehlale phansi emahofisini abo baluhlaziya, kutsho induna uLiberty Mleya.”
