uMthunywa
Nkosilathi Sibanda
NGEMVA kwemidlalo eyisithupha esidlalwe liqembu leHighlanders, sekuvele isixwayiso sokuthi abalandeli bayo abehlise ulaka emdlalweni ngoba lokho kuzakuba lempumela embi, ezaphambanisa iqembu kumkhankaso walo wokuthwala inkezo yeCastle Lager.
Lokhu kuza ngemva kokuba imvimbi yeqembu leli uAndrew Mbeba ephiwe ikhasi elibomvu kumdlalo wenkezo kaZibuse ngoLwesibili.
UMbeba kayisuye yedwa umdlali weHighlanders okwaziwayo ukuthi ungumdlali olomfutho, othembekileyo okokuthi uyenelisa ukuvimba ngemva kweqembu kodwa baphanjaniswa yikwehluleka ukwehlisa umoya emidlalweni emikhulu njengoweDynamos.
UMbeba ube semlonyeni yabalandeli kulandela “ukuphakamisa” unyawo kumdlalo weDynamos uNyasha Chintuli. Ngokuphazima kweso, unompembe uLawrence Zimondi umxotshele kubabukeli ngekhasi elibomvu.
Kuvamile ukuthi imidlalo edibanisa iHighanders leDynamos ikhiphe lonke ulaka kubadlali ngoba lo kungumdlalo omkhulu kunguqu yakuleli.
IHighlanders ibeyintshantshu okwesibili iminyaka ilandelana, isidla isitha esidala nge 5-3 kumbekwa. Umdlalo lo uphume kumabonakude.
Ngesikhathi amaqembu la engqikilana, intatheli yephephandaba likazulu ibuzisise ihlekana labalandeli lababukeli bemidlalo yeBosso mayelana ngokuziphatha kwabadlali.
Abadlali be Bosso
UKhethani Moyo osekela iHighlanders ekoBulawayo uthe akusinto emangalisayo.
“Engabe enze okungayisikho uMbeba kodwa angiboni ukuthi ukwenza kwakhe kuyamangalisa,” kutsho uMoyo.
“Kujwayelekile ukuthi sibone abadlali betshintsha isimo kumidlalo eminengi ehlanganisa iBosso leDynamos. Kumaqembu wonke abadlali bavuka ulaka.”
USimon “SamaNdlo” Ndlovu uthe: “Kungcono ngoba sinqobile kodwa ukuziphatha kumele kunqonqoselwe kubadlali.
“Ukuhlala sithola amakhasi avela kubonompembe kuyasilimaza kumidlalo yethu yeligi. Okuhle yikuthi lo bekungumdlalo wenkezo engaphathelananga lemidlalo yeligi.”
Kulandela ukujabulisa imimoya yabalandeli bayo ngokunqoba iDynamos, iHighlanders izathi ukuhlala isikhatshana isesigodlweni nanko inxuswe yiYadah kumdlalo weCastle Lager.
Iligi ephakemeyo ingena kuviki lesithupha.
Kusenjalo, ekhuluma lentatheli yephephandaba likazulu, ukaputeni weHighlanders u-Ariel Sibanda ubike ukuba iqembu leYadah Stars angeke libethuse. IBosso ihlezi kunombolo yesine kungalane yamaqembu, iYadah ikunombolo yetshumi.
Ukunqoba “kwethimu yezwe lonke” kukhweze igunya kubadlali bakaBrito Baltemar, osekugcwaliseka ukuthi ithimu le ingaba yingozi kwezinye.
“Silethemba. Asesabi lutho ngoba siwulungiselele umdlalo,” kutsho unozinti lo obizwa ngabanye ngokuthi nguDawu kumbe uMangoye.
— @NkosieLegend
