uMthunywa
Pumulani Mpofu
UMA abazali besehlukana bakhangela into ezisuthisa bona bodwa abasakhangeli ukuthi imiphefumulo leyo abayiletha emhlabeni izwa njani njalo kuzaba lengugquko bani empilweni zabantwana. UThemba Ndlovu uzalwa nguSiduduzile Nkomo loTravor Ndlovu, laba ababili bahlangana besesebatsha basebethathana ngokwesintu bahlala ndawonye.
Kwakukuhle laba ababili besathandana baba lomntwana oyedwa okuthiwa ngu Themba Ndlovu, uThemba wathi eseleminyaka emithathu kwabalengxabano phakathi kwabazali bakhe basebesehlukana. Ekwehlukaneni akuzange kube kuhle ngoba kwaba lokujikelana kwenkulumo ezimbi kwathukwana kwaliwa kwabanzima.
USiduduzile wathi ebona ukuba umendo suphelile wathatha umntwana wayatshiyela uNakaTravor. Ekumtshiyeni kazange akhulume lomuntu wafika nje watshiya umntwana egedini watshaya igedi wazihambela. Unina kaTravor wafica umzukulu wakhe elaliswe phansi, njengoba wayemazi wamdobha wangena laye endlini, ngokukhalipha okukhulu wavuka wayabikela amapholisa isiga esasala sisenzakala emzini wakhe. Amapholisa asembuza ukuthi uyamazi yini lomntwana wavuma ukuba ngumzukulu wakhe kodwa laye ubaba womntwana wayesehambe wajika itshoba. Njengoba umuntu engalahlwa ikakhulu engumzukulu wakho wathi uzamgcina abazali bakhe baze bahlanganise amakhanda baphenduke.
Abazali bakaThemba bahamba bajika itshoba uThemba waze wabaleminyaka elitshumi lanye belokhe bengakaze babuye kumbe batshaye ucingo. Wazigcinela umzukulu wakhe ugogo wamhambisa esikolo, uthe esefike ezingeni lesithupha kwathiwa sokufuneka incwadi yokuzalwa ukuze abhalisele ukubhala isigaba sesikhombisa. Wabizwa ugogo embuthanweni wesikolo lapho athola khona ithuba lokuba akhulumisane labasebenzi beTrinity Project abamchazela ukuba yena njengogogo ozala umfana akalalo ilungelo lokuba athathele umzukulu wakhe incwadi yokuzalwa ngaphandle encedisana labangakibo kanina.
Waxwayiswa ugogo ukuba kazame ukulonda umzila wabakosebele bakhe. Lokhu kwezwakala njengento enzima kugogo kodwa wazimisela ngoba ethanda ukuba umzukulu wakhe afunde njalo abelencwadi ezikwanileyo.
Wabuza buza ugogo waze wayawela kanye kusebele wakhe ngemva kokusokola okukhulu. Bakhulumisana njengabantu abadala laye unina kaSiduduzile wachaza ukuba umntanakhe lokhe wamgcina mhla behlukana lomkakhe ngakho kakaze aphenduke kumbe atshaye ucingo okutsho ukuthi laye kamazi ukuba wayangaphi.
Kwathi sebehlangene ogogo bomntwana baqubana baya e Trinity Project ukuthi bayethola ukwelulekwa ukuba njengoba abazali balo umntwana sebahamba umhamba mpela bangenzani.Bachazelwa ogogo ukuba bathathe ingcwadi zabantwababo ezokuzalwa kanye le khadi lomntwana lesibhedlela le ncwadi yalapho umntwana azalelwa khona bayekomsitheli. I Trinity Project yabapha incwadi yokubasekela mabesiyafika lapho okuthathwa khona incwadi zokuzalwa.
Zaqubana izalukazi zayabhekana lodubo lwabo ababeletheswe ngabantwana babo ,baphumelela ukuthi babhalise leyo ngcwadi yokuzalwa ngoba kwasekunanzelelwe ukuthi balengcwadi yabomthetho amapholisa ekhombisa ukuba lumntwana wabalekelwa ngunina ngakho udaba lwabo lwaluzwisiseka ukuba ngogogo abazama ukwenzela umzukulu wabo ikusasa elingcono.
Kuqakathekile ukuba umntwana athathiswe ingcwadi yokuzalwa esase lamaviki angadluli isithupha ukwenzela ukuthi ma kukhona okungenzeka komunye wabazali umntwana asale elento yomkhombisa ukuba ungowangaphi ukwenzela lalo osala laye ukuba engadubeki ngo ikusasa kalaziwa.
Asihlanganeni njalo kuviki elizayo.
Umlobi utholakala kukheli ethi www.trinity <http://www.trinity>project.biz loba kunombolo zocingo ezithi 0773 195 055.
