uMthunywa
Johas Moyo
INHLANGANISO ye-Veterinary Services ikhuthaza abalimi ikakhulu abesabelweni seMatabeleland abafuye inkukhu ukuthi bazinakekele kakhulu ukuze zingahlaselwa yikutshisa ngoba kuyingozi kizo.
Ngenxa yokutshisa lokhu kubikwa inengi labalimi elifuye inkukhu ikakhulu eMatabeleland North lifelwe zinkukhu ezinengi ngenxa yokutshisa yikho nje abalimi bekhuthazwa ukuba bazinakekele ngokuzipha amanzi kanye lokuzihlalisa emthunzini.
UDokotela wezifuyo esabelweni seMatabeleland North uNdabezinhle Mkhwananzi ubikele intatheli ukuba abalimi kuqakathekile ukuthi banakekele inkukhu zabo ukuze zingabulawa yikutshisa.
“Kuqakathekile ukuthi abalimi banakekele inkukhu zabo ukuze zingahlaselwa yikutshisa njengoba lonyaka kutshisa okuphindiweyo.
“Ukutshisa kuyabangela ukuthi inkukhu zingadli kuhle zilale kuphela okwenza zingakhuli masinya,” kutsho uDkt Mkhwananzi.
Uqhubekele phambili njalo waveza ukuthi endaweni ezitshisayo abalimi abafuye inkukhu kufanele bazigcine endaweni elomthunzi.
“Abalimi abahlala endaweni ezitshisa kakhulu kuqakathekile ukuthi bazigcine endaweni ezilomthunzi omkhulu njalo baziphe amanzi amanengi ngoba ngesikhathi sokutshisa kudingeka amanzi emzimbeni wazo.
“Kuqakathekile njalo ukuthi abalimi bagcine inkukhu zabo ezilugwini ezinkulu ukuze zihlale zikhululekile zingaminyananga. Ukuminyana lokhu kuyadala njalo ukuthi zitshiselwe kakhulu ziphethe ziginqa zihlaselwe ngumkhuhlane we-rash zife.
“Kuqakathekile njalo ukuthi abalimi abafuye inkukhu bahlale belemithi yonke eyenkukhu ukuze bavikele inkukhu zabo emikhuhlaneni etshiyeneyo njengoba ngesikhathi sokutshisa zandise ukuhlaselwa yimikhuhlane etshiyeneyo,” kuveza uDkt Mkhwananzi.
UDkt Mkhwananzi uphethe ngokucebisa abafuye inkukhu ukuthi babone ukuthi izilugu zabo zenkukhu zilezikhala ezingenisa umoya ukuze zibethwe ngumoya.
