uMthunywa
Langelihle Moyo
ABATHENGISA imithi yezifuyo lezilimo abeFarm and City sebekhuthaze abafuyileyo ngokuqakatheka kokuthena inkomo okuzenza zibe lohlonzi lwaphezulu.
UMnumzana Itai Shambambeva oyingcitshi kwezempilakahle yezifuyo uthe kuqakathekile ukuthi inkomo zithenwe ngoba esibayeni akumelanga kube lenkunzi ezinengi ngoba zicina zilimazana.
Ukuthena inkomo zisesengamathole kuyanceda ngoba kuyabe kulula ukuzibamba.
“Ukuthena amajongosi kuqakathekile ngoba kwenza inyama yesifuyo esiduna kungabe kuyinkomo kumbe imbuzi ibemnandi, kodwa nxa ingathenwanga inyama yakhona iyabe inuka yikho siyake sizwe abanye besithi abadli inyama yembuzi ngoba iyanuka,” kutsho uMnu Shambambeva.
UMnu Shambambeva ubuye wachaza ngendlela okumele zilandelwe ekutheneni amajongosi ukuze zingacini zisiwa.
“Okokuqala kulendlela yokuthena kusetshenziswa ingqamu. Indlela le, ifuna ukwenziwa ngonanzelelo, ngoba kuyabe kumele kusikwe kukhitshwe amabhola, besokusithi ngemva kwalokho kuthungwe kuvalwe lapho obekusikwe khona. Ikhona njalo imithi efafazwayo esilondeni evikela ukuthi inkomo ingahlaselwa yimikhuhlane esilondeni,” kuchasisa uMnu Shambambeva.
“Kundlela le nxa ubona ukuthi ngeke wenelise ukukwenza lokhu kuqakathekile ukuthi livakatshele labo ababona ngezempilakahle yezifuyo ezigabeni zenu ukuze balincedise ngoba nxa kungenziwanga kuhle inkomo iyafa.
“Indlela yesibili yokuthena kusetshenziswa okubizwa ngesiLungu ngokuthi ngama-rubber clips. Lapha ama-rubber clips lawa ayabopha amabhola esifuyo aze aziwele ngemva kwensuku ezimbalwa. Nxa lisebenzisa indlela le kulemithi okumele ifafazwe esifuyweni ukuze isifuyo singezwa ubuhlungu kakhulu lokuthi singangenwa ngagcikwane ehlukeneyo. Ama rubber clips lawa ayatholakala ezitolo zethu zeFarm and City lakwezinye izitolo ezithengisa imithi yezifuyo leyezilimo.”
Enye indlela engasetshenziswa yokuthena izifuyo yibhadiza. Ibhadiza ifuna ukusetshenziswa ngonanzelelo ngoba nxa uyisebenzisa uyabe uquma umsipha, njalo kuyabe kumele unanzelele ukuthi uqume umsipha oyiwo ngoba ungaphambanisa uyacina ulahlekelwa yisifuyo sakho,” kulandisa uMnu uShambambeva.
Uphethe ngokuthi abafuyileyo kumele bathene amajongosi abo ngesikhathi somqando kusenzelwa ukuthi izilinda zingabhibhidli.
