uMthunywa
PHAKATHI kwababili abathandanayo kuyenzakala ukuthi omunye abe legcikwane leHIV omunye angabi lalo. Lokhu kwaziwa ngokuthi yizithandani ezilezimo ezingafananiyo okubizwa ngokuthi ngama-sero-discordant kumbe mixed status couple ngesiLungu.
Elizweni leZimbabwe ukutholakala kwezithandani ezilezimo zegcikwane ezingafananiyo kungaba ngamaphesenti alitshumi lambili kusitsho ukuthi phakathi kwezithandani ezingu-100 ezilitshumi lambili zilezimo ezingafananiyo.
Kuqakatheke kakhulu ukuthi izithandani ezilobudlelwano kumbe ezisemtshadweni zihambe ziyohlola igcikwane leHIV zizonke.
Ekuhlolweni kwegcikwane leHIV bendawonye kanye lokwelulekwa njengezithandani kwenza kube lula ukuvezelana impumela yokuhlolwa kweHIV, kuyaphathisa njalo ukuthi benelise ukuhlela ikusasa labo.
Wonke umuntu ongazi isimo sakhe seHIV ukhuthazwa ukuthi ahlolwe igcikwane njengoba kuyindlela enhle yokuzinakekela, ukwelatshwa kanye lokuthola usekelo olugcweleyo.
Labo abahlolwa batholakale bengela gcikwane bayancediswa ukuthi bahlale bengelalo njalo banikwe ulwazi ngendlela zokuzivikela, kuthi abatholakala belegcikwane bayelulekwa njalo baqalise ukunikwa amaphilisi i-antiretroviral treatment (ART) masinyane.
Ukuhlolwa igcikwane leHIV kukhuthazwa kanye ngomnyaka kusiya ngezehlakalo ezenzakeleyo ezingenza ube sengozini yokuthelelwa.
Kulabo abasakhulayo ukuhlolwa igcikwane leHIV bengakatshadi kuhle njalo kukhuthaza ukuthi umuntu enze izinqumo ngokuvikela igcikwane leHIV emulini yakhe.
Kungatholakala ukuthi njengezithandani omunye ulegcikwane ekuhlolweni kwenu, akutsho ukuthi lowo muntu usethole isigwebo sokufa.
Labo abathandanayo kumele bayothola ukwelulekwa ngabakufundeleyo ukuze bancedisane ekuphileni legcikwane.
Omongikazi kanye labodokotela ezibhedlela ezinengi sebelolwazi ngeHIV, ezempilakahle kanye lezindlela zokuvikelwa kugcikwane leHIV ezingasetshenziswa ebudlelwaneni obulezimo zeHIV ezingafananiyo.
Lo otholakale elegcikwane kumele angene kuhlelo lwe-antiretroviral therapy (ART) njalo kumele alandele izixwayiso aziphiwayo ekwelatshweni.
Ukuthatha imithi yama antiretroviral kuyancedisa ukwehlisa izinga legcikwane leHIV emzimbeni.
Kuyehlisa igcikwane kakhulu (licine lingasabonakali), okwenqabela ukumemetheka kwegcikwane leHIV emuntwini okwenqabela ukucina uhlaselwa yimikhuhlane efana leTB.
Kukhuthazwa ukuthi lowo ongela gcikwane leHIV ancedisane lesithandwa sakhe esiphila leHIV ukuze kubelula ukuthi elatshwe.
Eyinye indaba eqakathekileyo ngezithandani ezilezimo zegcikwane leHIV ezingafananiyo yikusebenzisa ngendlela eqondileyo amakhondomu zikhathi zonke nxa zihlangana emacansini.
Phezulu kwalokho, izithandani kumele zixoxisane ngendlela zokuzivikela lokuhlela kanye lababona ngezempilakahle njalo belomuntu ololwazi.
Kuqakathekile ukuhlela ukuzithwala ukuze kuvikelwe umzali ongelagcikwane lomntwana ukuze bangatholi igcikwane. Ukuze kuvikelwe ukuzithwala okungahlelwanga, omongikazi abalolwazi bengancedisa lezo zithandani ukukhetha indlela zokuhlela imuli yabo.
Nxa lezo zithandani sezilungele ukuba lomntwana, omongikazi loba odokotela bangakuncedisa ngesikhathi esifaneleyo lapho ezingahlangana khona emacansini kungasetshenziswanga makhondomu, ngaleyondlela bayabe besengeza amathuba okuzithwala ngasikhathi sinye besehlisa izinga lokuthelelana igcikwane leHIV.
Ekwehliseni izinga lokuthelelana igcikwane leHIV, kukhuthazwa ukuthi kumele lokhu kwenziwe lowo ophila leHIV igcikwane lakhe lingabonakali emzimbeni okwenyanga eziyisithupha, enatha ngendlela eqondileyo imithi yakhe njalo engelamikhuhlane ethelelwana emacansini.
Ukuba lomntwana ongela gcikwane leHIV kuyenzakala nxa kuhlelwe kuhle njalo bangaba lenani labantwana abalifunayo.
Eyinye indlela yokuvikela igcikwane leHIV etholakalayo kulo omunye ongela gcikwane leHIV ebudlelwaneni obulezimo zegcikwane leHIV ezingafananiyo, yikuthatha amaARVs ukuvikela ukubanjwa ligcikwane leHIV.
Lokhu kwaziwa ngokuthi yiPre-Exposure Prophylaxis (PrEP) njalo kuyakhuthazwa kuwo wonke ama-sero-discordant couples.
I-PrEP ithathwa ngesikhathi usengozini enkulu yokuthelelwa igcikwane ikakhulu nxa lizama ukuthola ingane. Zonke izibhedlela lamakilinika kuleli ziyanika ulwazi lokuthola iPrEP.
Ngithemba ngemva kokubala lolugwalo, wena kanye lesithandwa sakho lizahamba liyohlolwa igcikwane leHIV nxa lingakwazi izimo zenu.
