uMthunywa
Langelihle Moyo
ABALIMI sebexwayise ngokuqakatheka kokumilisa usaba, ikakhulu kuzilimo ze-horticulture ngoba kwenza izilimo zikhule zilingana, zingezohlonzi futhi zizale masinya.
UMnumzana Jabulani Ncube ongumlimisi kwenye inkampani ethengisa inhlanyelo uthe ukumilisa usaba ngendlela eqondileyo kuyaphathisa kuhlonzi lezilimo.
“Kulendlela ezimbili abalimi abangazisebenzisa ukumilisa usaba lwabo. Indlela ye-floating method le-wire stand method.
“I-floating method isetshenziswa kakhulu ekumiliseni usaba lwesilimo segwayi losaba lwezihlahlakazana lezinye nje izilimo ze-horticulture ezehlukeneyo.
“Nxa similisa izilimo nge-floating method umhlabathi akumelanga ube lamatshe, izigodo, amambodlela afileyo lamaphepha umhlabathi kumele ulungiswe ulingane njalo ubone ukuthi nxa uthela amanzi ayageleza agcwale umbheda wonke, lifake ama float trays alandele kuhle umbheda besekusithi umbundwini lifake iphepha elimnyama eliyilo elifakwayo,” kutsho uMnu Ncube.
“Besokusithi i-wire stand method yona isetshenziswa ekumiliseni usaba lwezilimo ze-horticulture njalo indlela le iyenzelwa kuma-greenhouses. Lapha kusetshenziswa imithi emlutshwana, lamanzi amalutshwana, kudingeka njalo ukuthi usaba luthole imithi lufafazwe ukuze lungahlaselwa yizibungu lemikhuhlane, ukuze luthi solusiyahlanyelwa luhambe lungela mikhuhlane,” kutsho uMnu Ncube.
Uqhubekele phambili esithi ukumilisa usaba olulohlonzi kubalulekile.
“Uhlonzi losaba osolumilisiwe lulomutsho kusilimo esizavunwa ngumlimi kungakho siyakuqakathekisa ukuthi umlimi abe losaba olulohlonzi,” kutsho uMnu Ncube.
“Ukuba losaba olusezingeni eliphezulu kuyangokuthi usaba lwakho uluhlanyale ngesikhathi esiyiso yini, lokuthi inhlanyelo yakho kumbe intanga ozisebenzisileyo zingumhlobo onjani.
“Ngithanda ukulixwayisa ukuthi njengabalimi asizifundiseni ukusebenzisa inhlanyelo esezingeni eliphezulu nxa sihlanyela usaba lwethu ukuze usaba lwethu lumile luphilile njalo lube ngolohlonzi.
“Lokhu kwenza singalahlekelwa ikakhulu nxa sesihlanyela ngoba kwesinye isikhathi usaba lolu lucina lubuna lungabe lusabamba,” kuchasisa uMnu Ncube.
“Ukuthenga inhlanyelo engasi yohlonzi kubangela ukuthi usaba lungamili loba umlimi angaze athelele okunganani, uyalahlekelwa ngoba ngeke kwenze kuhle,” kulandisa uMnu Ncube
Uphethe ngokubaxwayisa ngokumele bakwenze kuma- floating trays abo nxa sebekhiphile usaba.
“Nxa selikhuphile usaba kuma-trays, gezisani ama-tray lisebenzisa umuthi obizwa ngokuthi yi-copper oxychloride kumbe eminye imithi yokugezisa, beseliwafaka emthunzini lapho angeke afinyelelwa khona ngamagundwane,” kuphetha uMnu Ncube.
