uMthunywa
Langelihle Moyo
ABALIMI abalamanzi okuthelela endaweni ezehlukeneyo sebekhuthazwe ukuthi balime umumbu wokosa ovame ukubizwa ngokuthi yi-green mealies.
Ingcitshi kwezokulima esabalweni seMatabeleland South uNkosazana Moreblessing Dube uxwayise abalimi abalamanzi okuthelela kuthi balime umumbu wokosa ngoba ulomkambo omkhulu.
“Ngalesi isikhathi sinanzelela ukuthi abalimi abanengi basevalweni lokwesaba ukulima, kulandela ukuthi kukhangelelwe ukuthi kuzakuba lezulu elilutshwana. Kodwa-ke abalimi ikakhulu labo abalamanzi okuthelela sibakhuthaza ukuthi balime umumbu wokosa esiqubiza ngokuthi yi-green mealies.
“Umumbu wokosa uyenelisa ukulinika inzuzo ethe xaxa loba indawo lapho elinywe khona incane, lomsebenzi wakhona awumnengi kangakho njalo akawudingi imali enengi ngoba lasekuvuneni akudingeki ukuthi umlimi adinge iziphala imitshina yokuvuna.
“Okuqakathekileyo nxa ulima umumbu lo yisikhathi sokuhlanyela, ukuvunda komhlabathi, amanzi kanye lomkambo lapho elizathengisa khona,” kulandisa uNkszn Dube.
Ubuye walandisa ngokumqoka okumele kulandelwe nxa abalimi belima umumbu wokosa.
“Okokuqala okumele likukhangele ngumhlabathi, ukuthi uvundile ukuze isilimo lesi sikhule siqinile, lokufaka imvundiso kuqakathekile ngoba kwesinye isikhathi umhlabathi uyabe ungasela kudla okweneleyo. Umvundiso wokuzalisa lawo uqakathekile ukuze umumbu wakhona ube leziqu ezinkulu.
“Okwesibili, kuqakathekile ukuthi lihlakulele izilimo, likhiphe ukhula, ngoba ukhula luyabe luncintisana lesilimo ukuthola amanzi lelanga lokudla okusemhlabathini. Yikho ke kuqakathekile ukuthi kuhlakulwe njalo kufafazwe ngemithi ebulala ukhula lezibungu esiyibiza ngokuthi ngama-herbicides,” kutsho uNkszn Dube.
Esephetha ukhuthaze abalimi ukuthi bangesabi ukulima nxa belamanzi besithi kuzakutsha.
“Kulabo abalamanzi singahlaleli izandla, asithengeni inhlanyelo ephangisa ukuvuthwa, silime sithelele sibe lesivuno sethu esihle, sithengise sithole imali enhle,” kuphetha uNkszn Dube.
