uMthunywa
Cornelius Luphahla
KULENDODA yeMabombo, eBinga etshiye umthethwandaba weBinga ukhuza umhlola ngemva kokuba ikhuthe ukubamba omunye umntwana iganyavu qede yabamba omunye njalo.
UChilemeko Mudimba (20) ohlala emzini kaVanson Mudimba ngaphansi kwenduna uDobola watholakala ebamba umntwana oleminyaka (11) iganyavu wasekhuzwa kanti bayamlola, ngemva kwalokho wabamba omunye njalo umntwana.
UMtshuthisi uBruce Maphosa ubikele umthethwandaba ukuthi umsolwa watholakala sebamba omunye umntwana iganyavu wakhuzwa ngabangakibo wabuya njalo wabamba omunye wasebotshwa.
“Kwathi ngomnyaka ka 2014 ngoMpalakazi umamangala wathunywa ukuyabiza udadewabo kamsolwa ngakibo wasethola engekho kulomsolwa. Kuthe kunjalo umsolwa wadumela umamangala ngentamo wamkhama wamkhipha isikhindi, umamangala wabanga umsindo kwathutsha umnewabo kamamangala wazomlamulela. Ngemva kwalokho umsolwa wakhuzwa wangabotshiswa.
“Njengoba ingaqhoba ithambo iyejwayela, umsolwa waphinda njalo wabamba umngane kamamangala iganyavu.
Kuthe kunjalo umamangala wayabikela umbalisi wakhe okwadala ukuthi umbalisi abikele amapholisa umsolwa wabotshwa,” kutsho uMtshutshisi uMaphosa.
UMantshi uAilene Munamati uthole umsolwa elecala lokufuna ukubamba iganyavu wasemgweba iminyaka emihlanu waseguqulela icala lokubamba iganyavu eHwange.
“Ufunyanwa ulecala lokufuna ukubamba iganyavu ngakho uzathola isigwebo seminyaka engu 5 usenkantolo kuthi emibili izakwephulwa usale lemithathu. Icala lakho lokubamba iganyavu lizathoniselwa emthethwandaba weHwange mhlaka 3 Mpalakazi,” kuphetha uMantshi uMunamati.
Kusenjalo esigabeni seTshefunye eTsholotsho kubikwa uWorld Ngwenya (18) obesejwayele ukudlova umnawakhe (9) iganyavu umdeni wakibo ukufihla ubanjiwe kuyonale iviki ngemva kokubonwa ngomakhelwane.
UMthunywa ukhulumisane lokhansila wakule indawo uMnumzana Patrick Ngwenya waveza ukuthi uWorld kukhanya ubeselesikhathi ekwenza lokhu.
“Ujaha lo kukhanya ubesezitholele umfazi kumnawakhe lo ngoba udokotela uchaze ukuthi umntwana lo usengumama okhulileyo. Kukhanya ujaha lo waqala ukudlova umntwana lo uyise esaphila, kodwa khathesi selomnyaka olezinyanga wabhubha. Abomdeni wakibo bathi bekuzwa lokhu bamkhuza bangambophisi ngoba umtwana lo owabanjwayo kazalwa lomamangala.
“Isimanga yikuthi ngithe sengihambisa ujaha lo emapholiseni abanewabo bathi ngimekele kukhulunywe mina ngathi kabayecela emapholiseni ukuthi kukhulunywe,” kutsho uKhansila uNgwenya.
Uqhubeke njalo waveza ukuthi indaba yokuhlukuluzwa kwabantwana kule indawo vele isivamile kakhulu.
“Ukuhlukuluzwa kwabantwana lapha sokuvamile ngoba abantwana laba abangazalwa loWorld Ngwenya bathwele nzima bubili babo njengoba lonina sowabhubha besele labanewabo. Ngesifiso sami ngabe abantwana laba bayasuswa bayehlala komalumabo.
“Okunye njalo abantwana abafunda eDikili bathwele nzima ngenjiva ngoba ziyabayenga zibaphe izipho zisuka lapho zibabalekele sebezithwele khonapho besasebancane. Sokusithi ngabe abakhangela ngokuhlukuluzwa kwabantwana bayangenela sincedisane ukuze kubotshwe izigangi lezi ezibahlukuluzayo,” kuphetha uKhansila uNgwenya.
