uMthunywa
Thokozile Mbedzi
KULENDLAMANZI zesiqintini seMayobhodo ePlumtree ezithe ngemva kokukhelela umagwebu zathi sezilubhekise emizini yazo zaxabana zibanga umakhalekhukhwini omunye wadobha isitina wamtshaya ngaso wafa.
Indlamanzi lezi, uGodknows Ncube oleminyaka engu-26 loMartin Nyathi oleminyaka engu-28 kubikwa batshona benatha bonke endaweni yamabhizimusi yeMakorokoro mhlaka 24 Ncwabakazi baze basuka phakathi kwamabili.
Kubikwa uNyathi loNcube sebesendleleni baba lokungazwisisani kubangwa umakhalekhukhwini.
Isikhulumi samapholisa esabelweni seMatabeleland South uAssistant Inspector Thandolwenkosi Moyo uthe amapholisa achwayisisa ngodaba lwendoda eyatshaya enye ngesitina ekhanda yafa kubangwa umakhalekhukhwini.
“Ababili abathi, uMartin Nyathi loGodknows babenatha bonke utshwala kwaze kwatshaya ihola lika-12 phakathi kwamabili.
“Besendleleni besiya emizini yabo, kwaba lokungazwisisani uNyathi esefuna ukuthathela uNcube umakhalekhukwini wakhe okwabangela ukuthi bacine sebesilwa.
“UNcube wadobha ilitshe watshaya uMartin waquleka wamfulathela wamtshiya lapho,” kulandisa isikhulumi samapholisa.
Kubikwa ngelanga elilandelayo omunye umakhelwane wathi esedlula wambona efile wayabikela amapholisa.
UAsst Insp Moyo uphethe ngokuxwayisa uzulu ukuthi atshiyane lomkhuba wokulwa nxa kulokungazwisisani.
“Sikhuthaza uzulu ukuthi nxa kulokungazwisisani abantu kabadinge umuntu wesithathu ongabancedisa ukuthi bakhumisane umlotha kulokuthi balwe ngoba lokhu kubangela ukulahleka kwempilo,” kuphetha uAsst Insp Moyo.
