uMthunywa
Ethel Ncube
KULENDODA yeFilabusi emiswe phambi komthethwandaba isetheswa icala lokuhlahlela uyise lonina ibethesa icala lokumloya ukuthi angazali.
Umsolwa uStephen Chinyaure oleminyaka engu-36 yokuzalwa umiswe phambi kukamantshi uMnumzana Abedinico Ndebele esetheswa icala lokwenza udlame ekhaya.
Umsolwa uChinyaure kubikwa wahamba komunye umphurofethi esiyadinga usizo lokuthi amiswe ngoba engelamntwana lokuthi inhlupho alazo ziphele wabikelwa ukuba isimo akiso sibangelwa ngabazali bakhe.
Kubikwa esizwa lokhu wathukuthela kakhulu wathi efika ngakibo kazange aphozise amaseko kodwa wahle waqonda lapho okuhlala khona ihloka walidobha wahlahlela uyise lonina.
Umsolwa kubikwa watshela abazali bakhe ukuthi usekwazi ukuthi kazali nje kungenxa yobuthakathi babo.
Ebuzwa ngumantshi ukuthi kungani wahlasela abazali bakhe umsolwa uthe wayethukuthele.
“Nkosi, umphurofethi wangitshela ukuba okwenza ngingamithisi yibuthakathi bukamama lobaba, lokhu yikho okwangenza ngathukuthela ngabatshaya.
“Waphinda wangitshela njalo ukuthi ubunzima bonke engihlangana labo empilweni buvelela ebazalini bami,” kutsho umsolwa uChinyaure.
Umantshi unqume ukuthi umsolwa kumele ayepika ejele okweminyaka emithathu andubana abeke eceleni inyanga eziyisithupha kukhangelelwe ukuthi angadali icala elifanayo kuminyaka emihlanu ezayo.
