uMthunywa
FORT RIXON
KULENDODA yelokitshini leNtumbane koBulawayo egwetshelwe ukuyapika ejele inyanga eziyisithupha kulandela ukutholakala ilecala lokuphatha amanqe amabili.
Umsolwa uBekithemba Tshuma oleminyaka engu-29 yokuzalwa utholakale elamanqe amabili afileyo, okuzinyoni ezivikelwayo elizweni lakuleli njalo kubikwa abiza imali engange US$3 000.
UTshuma ulivumile icala lakhe phambi kukamantshi uMnumzana Lizwe Jamela ngoLwesihlanu olwedluleyo.
Umthethwandaba uzwe ukuba mhlaka 27 Nhlolanja ngehola lesikhombisa ntambama eShangani Sanctuary, eFort Rixon abalinda indawo le bathola umlayezo wengozi eyenzakale eduzane lendawo yabo.
Kubikwa ukuba onogada laba bagijima bayahlola umonakalo wengozi le, bakhuthuza imota kaTshuma okwenza bathola amanqe amabili afileyo.
UTshuma wacelwa ukuba akhiphe incwadi ezimnika imvumo yokuba aphathe inyoni lezi kodwa wayengelayo okwenza bamusa enkambeni yamapholisa eFort Rixon.
Umsolwa ukhangelelwe ukuthi angenzi icala elifanayo kuminyaka emihlanu elandelayo.
