uMthunywa
Thokozile Mbedzi
KULENDODA yeMbizo eKwekwe egwazwe yaze yafa ngoLwesihlanu kuviki ephelileyo ngenye indoda ngoba ibone etshaya inina elake laba ngunkosikazi wakhe ebelibuza imali yesondlo.
UMthunywa uzwe ukuthi uGilbert Foya oleminyaka engu-25 yokuzalwa kunye lowayengunkosikazi wakhe uChipo Phiri babenatha bonke eMbizo Nightclub endaweni yamabhizimusi yeMbizo 4, baze baqale ukuxabana ngemali yesondlo somntanabo oleminyaka emithathu.
Kubikwa ababili laba bacina bephuma phandle ukuze bayokhulumisa kuhle.
Kuzwakale ukuba ngesikhathi bephandle uFoya wabonakala etshaya uPhiri okwenza enye indoda eyayisemoteni yaphuma iphethe ingqamu yagwaza uFoya umzimba wonke andubana ingene emoteni ihambe.
Ingqamu
Isikhulumi samapholisa eMidlands uInspector Emmanuel Mahoko uthe kulendoda egwazwe yafa eMbizo ibonakale itshaya owesifazana.
“Kulendoda egwazwe yafa mhlaka 21 Mfumfu ngehola lokuqala ekuseni kulandela ukubonakala itshaya owesifazane, enye indoda yasimisa imota yamgwaza.
“UFoya wathwalelwa esibhedlela seKwekwe General Hospital kodwa ngokusweleka kwenhlanhla wafika esedlule emhlabeni.
“Amapholisa aphenyisisa udaba lolu ngakho ongaba lolwazi ngalo kazise amapholisa aseduzane laye,” kuphetha uInsp Mahoko.
