uMthunywa
Ethel Ncube
KULEZISEBENZI ezintathu zesinye isitolo elokitshini lePumula East eLuveve koBulawayo ezibotshwe kulandela ukutshaya zibulale elinye isela elitshontshe inamunede esitolo ezisebenza kuso.
UThabo Dube (19) loPride Magutshwa (23) kunye loNgonidzashe Mukonyora (29) bacatshangelwa ukuba babhaxabule uMutuma Mbewe oleminyaka engu-22 kwelinye iganga eliseduzane leNew Magwegwe ngemva kokumbamba etshontsha esitolo seHamara abasebenza kuso okwabangela ukuthi acine ebhubha esibhedlela seMpilo.
Isikhulumi samapholisa elizweni kubulembu beTwitter uAssistant Commisssioner Paul Nyathi ufakaze ukuthi amapholisa akoBulawayo achwayisisa udaba lapho izisebenzi zesinye isitolo koBulawayo okubikwa zatshaya indoda eyabonakala itshontsha esitolo.
UMthunywa uzwe ukuthi isela leli labonakala litshwathika inamunede phakathi kwesikhwama okwenza izisebenzi lezi zalimukisana ngale indoda okwenza yathi isiphuma esitolo bayibamba.
Kubikwa isela leli balibamba balivalela kwenye indlu kodwa laphunyuka lacela ezinyaweni izakhamizi zancedisa ukuze libanjwe balitshaya ngenqindi okuyikho okucatshangelwa ukuba kwabangela ukuthi libhubhe ngosuku olulandelayo esibhedlela seMpilo.
