uMthunywa
INDODA ekhipha umoya obulala imiyane isiveze ukuthi isile sivumelwano lenkampani enkulu eyenza imithi yokuxotsha izibungu ezahlola imfihlo yomoya awukhiphayo.
UJoe Rwamirama (48), ovela eKampala elizweni le Uganda uthi ingcitshi seziqale ucwaningo lokuhlola umoya awukhiphayo ngenhloso yokudingisisa ukuthi kuyini okwenza ubulale izibungwana.
UJoe waziwa edolobheni njengendoda okumele uyisondeze eduzane nxa usukhathele ngemiyane.
UJoe uphanga athembise abantu ukuthi umoya awukhiphayo uyingozi kuzibungwana nje kuphela.
Lindoda enza imisebenzi etshiyeneyo ithi akulamuntu esigabeni sakibo osewake waba lomkhuhlane woqhuqho ngoba amandla akhe ahamba okomango ongange 6 miles.
Enye indoda egela abantu inwele uJames Yoweri uthe: “UJoe uyaziwa njengendoda elamandla okubulala imiyane isebenzisa umsuzo wayo.
“Siyazi mhlophe ukuba uJoe nxa eseduzane imiyane iyabaleka. Uyahlonipha abantu njalo ukhipha umoya kuphela nxa kulemiyane eletha uqhuqho. Umoya wakhe uyaxotsha imikhuhlane.”
Induna emaziyo uJoe kusukela esakhula ithe yamthatha wahlala laye ngesikhathi sokwanda kwemiyane ebangela uqhuqho njalo uthi akulamuntu owayelapho owaba lomkhuhlane lo.
Induna ithe: “Ngezwa ngesipho sikaJoe ngamthatha ukuze ngixotshe imiyane eyayisigcwele eduzane.
“Umoya wakhe uwukhipha ngenhlonipho njalo waphathisa ukuxotsha izibungwana. Angawukhipha nje izibungwana ziyafa.”
UJoe uthe: “Ngizidlela ukudla okujwayelekileyo okufana lokudliwa ngabanye abantu kodwa akula ngitsho isibungwana esihlala phezu kwami.
“Ngilomnuko ofana lowamanye amadoda njalo ngiyageza nsukuzonke, kukanti umoya engiwukhiphayo ufana lowomuntu wonke, umahluko yikuthi uyingozi kuzibungwana ezincane, ikakhulu imiyane.”
UJoe ulephupho lokuthengisa umoya awukhiphayo.
Imbiko yokuthi umoya okhitshwa nguJoe ubulala imiyane ivele ebulenjini ngoLwesibili kodwa amankampani amabili asenze isivumelwano laye kakavezwa. — Ubulembu
