uMthunywa
Thokozile Mbedzi
ZILOKHU zinkemile izakhamizi zelokitshini leSizinda koBulawayo kulandela ukuzwa ngesinye isigebengu esibambe elinye inina iganyavu livela enkonzweni.
Kubikwa inina leli elileminyaka yokuzalwa engu-35 belivela esontweni lomngane walo oleminyaka engu-45 ngeSonto baze bahlaselwe yisigebenga lesi esingaziwayo andubana sidlwengule omunye wabo omunye ekhangele.
Ekhuluma lentatheli kaMthunywa uMaria Dube uthe lokhe bengelankani ngesiga esehlele amanina la amabili ahlaselwe egqoke izembatho zawo zebandla.
“Lokhe simangele ngesiga lesi ngoba isigebenga leso kasizange sesabe nje lokuthi abantu laba bebevela enkonzweni njalo begqoke izembatho zabo.
“Kukhanya ababili laba bahlangana lesigebenga lesi esingaziwayo ilanga selibantu bahle duzane leWestgate sabathathela omakhalekhukhwini sasesibethusele ngengqamu siqale ukubahambisa enjanjini andubana bathi sebeseduzane lekilinika yeTshabalala sibamise sadlwengula oyedwa omunye ekhangele,” kuchaza uNkszn Dube.
Isikhulumi samapholisa koBulawayo uInspector Abedinico Ncube ebuzwa ngodaba lolu uthe solufikile ehofisini yabo ngakho uzulu uyaxwayiswa ukuba kabahloniphe imthetho yeCovid-19.
“Uzulu kalandele izixwayiso zeCovid-19 kunye lemithetho ye-lockdown. Bangahambi emasontweni angenela egangeni ukuze bengahlangani lengozi efanana lale,” kuphetha lnsp Ncube.
