uMthunywa
YiNtatheli kaMthunywa
ZISELE zibambe owangaphansi izakhamizi zesigabeni sakoSojini eMbembesi ngemva kokuba esinye isakhamuzi sakule indawo sihambise inkalakatha yenyamazana esankawu, impondo kanye lenkalakatha yeqhaga kubaphurofethi sisisthi besikusebenzisa ukuziqinisa.
Insindabaphenduli le yenzakale ngoLwesine kuviki ephelileyo lapho uMnumzana Gideon Mpofu ehambise inyamazana le engakaze ibonwe muntu kodwa efana lenkawu ecela ukuthi bayitshise ngoba isimhluphile.
Ekhuluma loMthunywa uNkosikazi Samukeliso Ndlovu uchaze ukuthi uMnu Mpofu wathi izinto zakhe lezi bezimhlupha kakhulu ngokumthwala nxa elele ebusuku.
“UMpofu wathi ubesethwele nzima ngezinto zakhe lezi noma nje wayezidinge ethi ngezokumqinisa. Wathi kwesinye isikhathi ubethi nxa elele ekamelweni lakhe zimthwale avuke esesemkulwini yikho okwadala ukuthi abize abaphurofethi ukuthi bazithathe bazitshise,” kutsho uNkkz Ndlovu.
Omunye walaba baphurofethi owaziwa ngokuthi nguSilo ubikele intatheli ukuthi uMnu Mpofu wasuka wayabikela abaphurofethi laba ukuthi ulezinto zakhe ofuna bazitshise labo bavuma ukuthi azilethe.
“USibanda wafika kithi wathi kulezinto zakhe ofuna sizitshise esezimhlupha. Savuma-ke sahamba laye sayazithatha sathola okuyinyamazana lokhu, impondo eziyisithupha kanye leqhaga ethi ngokwakhe okokuziqinisa okwamanje sokumhlupha yikho sakuthatha sakutshisa,” kutsho uSilo.
Ebuzwa ngale indaba uMnumzana Gideon Mpofu uchaze ukuthi ngeke akhulume imfihlo yomuzi wakhe.
“Mina ngeke ngikhulume imfihlo yomuzi wami ngakho abakutshele khonokho baqondile labo. Kodwa iqiniso yikuthi abantu balapha bayangizonda yikho bengangifuni lapha bekutshela lemfihlo yomuzi wami. Akukho okunye engingakukhuluma ngaphandle kwakhonokhu,” kutsho uMnu Mpofu.
Usobhuku wakule indawo uMnumzana Sipho Nombembe ubikele intatheli ukuthi indaba le uyayazi laye.
“Lami ngezwa ukuthi kwakhutshwa izinto koMpofu noma nje ngalesosikhathi ngangingakafiki kubaphurofethi ngoba kwakusasekuseni kakhulu,” kutsho uMnu Nombembe.
