uMthunywa
Ncekwenhle Ncube
ZIMADOLONZIMA njalo zisele zibambe owangaphansi izakhamizi zeBinga esigabeni seKariangwe ngemva kokuba elinye ijaha lakulesi isigaba litshaye uyisemkhulu ngempama lambulala kubangwa isigodokhaya ngeSonto edluleyo, uMthunywa uyakuveza lokhu lamhlanje.
Lindaba yenzakale esigabeni seKariangwe lapho umsolwa uDeploma Munenge oleminyaka yokuzalwa elitshumi lambili (22) exabane loyisemkhulu uMnumzana Kaliange Munkulu kubangwa utshwala okwenze balwa.
Intatheli kaMthunywa ibikelwe ukuthi ababili laba bebezinathela kuhle utshwala kodwa babonakala sebetshingelana okwenze iqula lamanye amadoda abezikholisela lasukuma labalamula.
Kubikwa ngemva kwemizuzwana nje belanyuliwe umsolwa uMunenge usukume walanda uyisemkhulu wamvala ngempama emtshiye ethe daca emhlabathini edonsa nzima umoya.
Omunye umfakazi oqotho ongathandanga ukuvezwa igama ubikele intatheli ukuthi umsindo wavuka ngemva kokuthi umuyi uMunkulu ezame ukuxwayisa umsolwa uMunenge ukuthi engakwenzi ukuxabana labazali bakhe ngoba ezaba lomnyama.
Lokhu kuza kulandela ukuthi kwakungansuku zingaki umsolwa exabane loyise wambamba wamncindezela emhlabathini kwaze kwalamula omakhelwane.
Kuzwakele ukuthi ngemva kokuqaleka kukamuyi ababekhona eduze benza imizamo yokumvusa ngokumthela ngamanzi waze waphaphama kodwa akasathathanga isikhathi wabuya waphela.
Ngaleso sikhathi umetheswacala kubikwa wasuka wazitshaya isifuba etshiya uyisemkhulu eqalekile esithi yena abantu abathanda ukufaka amakhala endaweni ezingadingi bona uyabafaka endaweni yabo.
Amapholisa abikelwa loludaba ahle asukumela phezulu amdinga waze wabotshwa kuyonale iviki ephelileyo.
UMnu Collen Maponga uthe bona bacabangela ukuthi okwenza umsolwa enze zonke lezizinto yikubhema kakhulu imbanje njalo kafuni lokuthenga utshwala.
“Undoda lo sijayele ukunatha laye. Nxa enathile kalankinga kodwa engabhema imbanje uyaqala ukwenza njengenyamazana. Engxenye etshaya ukhulu wakhe wayebhemile.
“Okunye yikuthi umfana kafuni ukuthenga utshwala. Kungabe kwenzeka ukuthi umdala wathi kasafuni lotshwala bakhe wahle wameqela,” kulandisa uMaponga
Umfowabo kamsolwa othande ukuvezwa ngokuthi nguMnumzana Cecil uthe kuliqiniso sibili ukuthi kwabakhona ukungazwisisani phakathi kukakhulu lomsolwa okwenza ukhulu watshaywa ngempama wafa.
“Lathi sezwa kuthwa ukhulu kasekho utshaywe nguDeploma ngempama wafa. Ukuthi babebangani asikabileqiniso lakho kodwa bebesetshwaleni.
