uMthunywa
Thokozile Mbedzi
ZILOKHU zinkemile izakhamizi zelokitshini leNketa koBulawayo ngemva kokuba enye indoda igwaze yabulala unkosikazi wayo ngoba ecele imali yesitshebo.
UMehluli Dube oleminyaka engu-47 kubikwa ugwaze unkosikazi wakhe, ngeSonto kuyonale iviki kubangwa imali yesitshebo.
Kubikwa umetheswacala umkakhe wathi emcela imali yesitshebo wathi kayethatha emadodeni akhe atshone kuwo edolobheni.
Ekhuluma lentatheli kaMthunywa uNkosazana Duduzile Nyoni uthe njengomakhelwane lokhe bekhakhamele ngesenzo sikaDube.
“Okwenziwe nguDube kuhlasimulisa umzimba. Unkosikazi wakhe uthe evela edolobheni wacela imali yesitshebo yena wathukuthela waqala ukumthuka.
“Unkosikazi wakhe esetshelwe amagama anzima ngumkakhe wamtshaya ngempama kabili uDube kulokuthi azithibe yena wathatha ingqamu eyayiphezulu kwekhabothi wagwaza unkosikazi wakhe kanye ehlombe lesandleni sokudla wawela phansi.
“UDube uthe ebona ukuthi umkakhe useqalekile njalo usephakathi kwechibi legazi wangena endlini yokulala wazikhiyela phakathi,” kulandisa uNkszn Nyoni.
Isikhulumi samapholisa koBulawayo uInspector Abednico Ncube ebuzwa ngodaba lolu uthe solufikile ehofisini yabo.
“Kuvulwe icala lokubulala enkambeni yamapholisa eNketa. Kulendoda eleminyaka engu-47 egwaze umkayo kubangwa imali yesitshebo.
“Njengamapholisa sikhuthaza uzulu ukuthi axazulule inkinga ngokukhulumisana kulokucina kulwiwa ukuze kwenqatshelwe amacala afana lala,” kuphetha ulnsp Ncube.
