uMthunywa
Ethel Ncube
KWEHLE iyezi elimnyama emulini yeVictoria Falls ngemva kokuba enye indoda ibulewe yindlovu isiya esilindweni samabhasi ngoLwesibili kuyonale iviki. Umuyi uMnumzana Shadreck Moyane uvukele ukuyagada ibhasi, ngokuswelakala kwenhlanhla wahlangana lendlovu ehle yavusana laye yamtshiya engokunye wathwalelwa esibhedlela lapho afike wedlula emhlabeni.
UMthunywa uxhumane lomunye wabazwe umsindo lo ekuseni uNkosazana Beatrice Tshuma othe okwenzakeleyo kubatshiye bethithibele.
“Umuntu lo ngesikhathi indlovu isilwa laye uhlabe umkhosi edinga usizo ebantwini kodwa kazange aluthole, wonke umuntu ubesesaba eswela ukuthi angamsiza njani.
“Indlovu ilwisane laye yaze yamekela yamtshiya kodwa evele esebangwa lezibi njalo elimele kabuhlungu. Ekuhambeni kwakhe esibhedlela kufike kwehlula wahle wedlula emhlabeni.
Tinashe Farawo
“Silusizi ngaloludaba, khathesi inyamazana sezizadlalela ebantwini zidinga ukudla. Sokomile, asazi ukuthi sizenza njani sizaphepha na ngoba indawo yethu ivele igcwele inyamazana,” kubika uNkszn Tshuma.
Intatheli ixhumane lesikhulumi seZimbabwe National Parks and Wildlife Management uTinashe Farawo othe indaba enjalo yenzakele.”
“Ingozi le yenzakele sibili, sikhala lemuli ngokulahleka komphefumulo womuntu. Khathesi njengoba komile kunje inyamazana ziyahamba, sikhuthaza uzulu ukuba ahlale eqaphele,” kuphetha uMnu Farawo.
