uMthunywa
Ethel Ncube loThokozile Mbedzi
KUSIGA esihlasimulisa umzimba, kulendoda yeMbalabala ebulele “umfumbesi” wayo kubangwa ukuba wehluleke ukubhadala imali yocansi.
Iqeda kumbulala, kubikwa yamsika izandla, ifuna ukuthi ifihle isidumbu endaweni ethile.
Indaba le yenzakale ngeviki edluleyo.
Kubikwa uLethukuthula wabulala uFreeman Moyo, ngesizatho sokuthi wehluleka ukubhadala imali “yocansi” yelinye inina okuthiwa nguNomsa, ongudadewabo wentombi yakhe.
UMthunywa uzwe njalo ukuba uNomsa lomuyi uMoyo babevumelane ukuthi imali yocansi le izabhadalwa bengaqeda ukuncinda uluju lwemvelo.
Kuthe umuyi esehluleke ukubhadala, wathathwa wayabulawa nguLethukuthula obethandana lodadewabo kaNomsa.
Ekhuluma loMthunywa, omunye wezakhamizi zakulindawo uMnumzana Sethule Ndlovu uthe umuyi wafa ngesihluku.
“Umuyi wasuka ezitolo loNomsa baqonda endlini bebe lesivumelwano ukuthi uFreeman uzabhadala US$20. Bathe sebeqedile, uNomsa wacela imali yakhe waphiwa 400 bond leR20 kuphela. Kwavuka umsindo khonapho.
“Bathe belokhu besehluleka ukuzwanana, uLethukuthula wafika wangenela indaba, uFreeman wacela ezinyaweni waqonda egangeni, wamlandela, wafika wambulala. Uthe esembulele wamquma izandla ngenhloso yokuba azame ukufihla umzimba wakhe, kodwa kwehlula, isidumbu sacina sibonakala,” kutsho uMnu Ndlovu.
Intatheli ixhumane lobambele isikhulumi samapholisa esabelweni seMatabeleland South u-Inspector Stanford Mguni obike ukuba udaba olunjalo basaluchwayisisa.
“Indaba le ifikile endlebeni zethu. Sikhuthaza uzulu ukuba nxa ethe waba lengxabano azame ukuyilungisisa kuhle kungela kulwa kumbe ukubulala,” kutsho u-Insp Mguni.
