uMthunywa
UBUKHOKHELI obulengqubekela phambili bukaMongameli Mnangagwa buyezwakala esabelweni seMatabeleland lapho umbuso wakhe osulethe impumelelo ngokuphatheka kuzinhlelo ezitshiyeneyo eziphakamisa impilo yoluntu.
Kumgceke ukuba uMongameli uzimisele ukubona ilizwe liguquka kwezomkhonomi yiloba nje izijeziso zomnotho zilokhu zisabophile njalo ilizwe lihlaselwe yisilo seCovid-19.
Zinengi inhlelo eziqhutshwa nguHulumende ezifana le Gwayi-Shangani Dam, isibhedlela seKusileni leseLupane Provincial Hospital phakathi kwezinye ezinengi ezazimisiwe eseziqakathekiswa, ziqediswa njalo zithuthukiswa ngaphansi kombuso we Second Republic.
Umsebenzi kaMongameli uyanconywa kakhulu nanko phela izakhamizi zizakube sezithola amanzi avela eGwayi Shangani Dam. Uhlelo lolu lukhangelelwe ukuthi lugqitshwe ekupheleni kwalonyaka.
Kukhona inhlelo zokubona ukuthi ilizwe leZimbabwe lizakube selithengisela amanye amazwe amagetsi kusikhathi esilandelayo nje eziqhutshwa esabelweni seMatabeleland North.
Konke lokhu kufezeke ngenxa yenhlelo zikaHulumende eziqhutshwayo ezifana le Transitional Stabilisation programme (TSP) ngomnyaka ka 2018 leNational Development Strategy (NDS1).
Idolobho leBeitbridge lalo kalisalelanga emuva nanko phela uHulumende ngaphansi kukaMongameli sowaqala ukuthuthukisa izakhiwo ezikumngcele ukuze zibe ngezohlonzi lwaphezulu. Okunye okuhle ngaloluhlelo yikuba umsebenzi lo unikeze izakhamizi imisebenzi.
Ngempela impilo kaZulu iguqukile nanko phela ngemva kokuqalwa kohlelo lwe-Intwasa abantu abanengi babelesivuno esihle. Izikolo lamakilinika kuyakhiwa ezabelweni zonke zelizwe kukanti imigwaqo layo iyalungiswa lamabholoho ayakhiwa.
