uMthunywa
NGITHE ngenye yamakhefu ngavakatshela ubabakazi owendele eNtabazinduna,ngagada ibhasi lomunye umama owayesidla angani uyabukiswa embukisweni we Trade Fair koBulawayo. Ngethuswa yindlela ayemofuza ngayo, phela wavula umphako wadla, endleleni okuthengiswa ngamafasitela ebhasi wayekuthenga amontshele emlonyeni.
Wayehlanganisa izithelo zeganga lezesikhiwa lezilimo ezemasini ezifanana labo ndlubu, mumbu, mazambane.Ngenhliziyo ngazitshela ukuthi kanje isintu sithi oginya amaganu ngothembe ukuthi ulomphumelo obanzi.
Indlubu
Phela lumama ngendlela ayesidla ngakhona wayengancinta ngitsho sibi sayo ingulube elemidlwane ngoba yona ingakhethi kungaze kube lijodo kumbe likiliwane isenzela ukwehlisela abandlwane bayo uchago.Wezwakala omunye ugogo owayehlezi duze kwethu esithi inhliziyo yalowo mama yayimhlophe khepha nangu udla lokhu lalokhuya.
Sithesesihambe umango othize saqala ukuxhwatha isisu wahlanza,phela ukuthi ngithi wayekhupha ,kahle kahle wayephoqoza okosane oluhitshwe luchago lukanina, sithe sisathi kumbe wezwakala esecela ukumisa ibhasi esefuna ukuyakhama ithumbu ngitsho ukuyazinceda egangeni,ngapha umzimba wakhe wawondlekile.
Wahamba indlela yonke emisa ibhasi ecela ukuyazinceda ethi nxa esevela khona bachile amakhala abantu ngoba kwasokuzwala iphunga elaselivimba amakhala, thanda wayethi nxa ibhasi imtshayela ihuta ukuthi enze masinya acine engasesuli kuhle kusale kuthe hlikilili emsisileni.
Ngezwa esexolisa kwabebhasi esithi inkinga kwakuhlatshwe imbuzi ngayizolo kwakhona wadla ozibindi, ombendeni labobunde,waphinda wahamba esidla indlela yonke.
ibhasi
Bayakuthanda abanye abantu ukuthi angagada ibhasi ubone ngesikhatshana usefukutha umangale ukuthi indlala yakhona isivele ngaphi lomphako ungakapholi. Bantu asizijwayezeni ukuthi sidle esijwayeleyo nxa sizaba logwendo ukwenzela ukuthi singasikwa yizisu uthole umuntu esehamba ehlahle amehlo angani ngumuntu ogade isitimela esingayisiso ngoba ngoba ngeke sime ukuthi wehle singakafiki esilindweni.
Phela isisu laso siyethuka, omunye ufukutha aze aqunjelwe ethi nxa esephefumula abhodle umoya wesibhoko onuka phu sengathi liqanda elilithube.
Ayixabene.
Mehleli nkunziyembongolo Dube.
