uMthunywa
Thokozile Mbedzi
ZISATSHWAQE umzimba izakhamizi zesigabeni seChiredzi ngemva kokuba enye indoda itshaye uyisemkhulu andubana ithathe ingqamu imqume umphimbo.
Isehlakalo lesi senzakale kuviki ephelileyo esiqintini seCheleni, lapho umetheswacala uAdvance Chihandhale oleminyaka engu-29 atshaye uyisemkhulu uTsuvhani Hasane oleminyaka engu-70 ngemva kokuba lengxabano.
Isikhulumi samapholisa esabelweni seMasvingo ulnspector Kudakwashe Dhewa uthe kulendoda ebulele uyisemkhulu ngokumquma umphimbo.
“Umetheswacala uAdvance kukhanya waxabana loyisemkhulu ngesikhathi besele bobabili ngekhaya.
“Omakhelwane bezwa umsindo suthe phothololo emzini kaHasane kholokho babona uAdvance esedonsa ugodo lokubiya egumeni wayatshaya ngalo uyisemkhulu kanengi emzimbeni.
“UAdvance waqhubeka ehlezi uyisemkhulu amadundulu andubana akhuphe ingqamu yohlobo lwe-Okapi esikhwameni sebhulugwe wasemquma ugqogqogqo,” kulandisa uInsp Dhewa.
Kubikwa isenzo sikaAdvance lesi sahle sabangela ukuthi uyisemkhulu adlule emhlabeni khonapho.
Umetheswacala kubikwa kazange abaleke kodwa waqhubeka emi lapho omakhelwane labo bafika bama bucwadlana ngoba elokhu ephethe ingqamu yakhe ethi ozavele asondele uyaqedelana laye.
“Abantu besizwa lokhu njalo bebona ukuthi wayengadlali bama amadlodlongwane kwaswelakala loyedwa owalamulayo ngoba besesabela impilo zabo.
Omunye umakhelwane ebona imbedumehlwana le wagijima wayabikela amapholisa.
Ekuphenyisiseneni kwamapholisa kwananzelelwa ukuba uHasane wayephuke isandla sokudla, elenxeba elitshonayo empinjeni elibangelwe yikuqunywa ngengqamu kanye lamanxeba umzimba wonke lapho ayetshaywa khona ngesigodo.
“Isidumbu sikaHasane sathwalelwa emotsha yeChiredzi General Hospital ukuze siyehlolwa imbangela yokufa.
“Amapholisa akhuthaza uzulu ukuba aqakathekise ilungelo lempilo kungakho nxa kuthe kwaba lengxabano akudingwe indlela zokukhumisana umlotha kungelabudlwangudlwangu,” kuphetha ulnsp Dhewa.
