uMthunywa
Thokozile Mbedzi
AKWAZIWA ukuthi kuyini okwangena engqondweni yelinye inina leCharandura elabulala usane lwayo lusanda ukuzalwa, ngokulugongoda ngophini, lafaka isidumbu phakathi kwengiga andubana iyosingcwaba egangeni.
Le yindaba esegudwini esabelweni seNkabazwe, esidide izakhamizi zesigabeni sakoMunhunga, ngaphansi kwenduna uHama nanko phela lesidumbu sosane asibonakali.
Kubikwa inina leli, uSusan Manikayi, oleminyaka yokuzalwa engu-34, uthe eqeda kubeletha usane ngenyanga kaMabasa wadobha uphini wagongoda usane ekhanda, lwafa.
Iphephandaba likazulu lizwe ukuba uManikayi wathi eqeda ukwenza lokhu, wagoqela isidumbu ngesiketi wasesifaka phakathi kwepulasitiki wasifaka engigeni andubana ayosingcwaba egangeni. Kubikwa wenza konke lokhu emehlweni abantwana abancinyane ayehlala labo.
Isimanga yikuthi umzimba awuzange utholakale ngesikhathi udaba seluphenywa ngamapholisa.
Amapholisa eNkabazwe aveze lokhu ngokugcweleyo.
Omele isikhulumi samapholisa eMidlands uAssistant Inspector Fungai Ngawagare uthe uManikayi wasuka eHarare ngenyanga kaMabasa ezithwele waya kibo eMunhunga, emaphandleni eGweru, ejonge ukwenza leli ihlazo lapho.
“USusan Manikayi wasuka eHarare ngoMabasa ezithwele. Ngobusuku balelolanga, wangena emkulwini wacela abantwana abancane ahlala labo ukuthi babase umlilo. Ngemva kwakho, wabaxotshela phandle, wasala eyedwa,” kubika uAsst Insp Ngawagare.
“Esemkulwini wabeletha usane lwakhe. Kodwa wasuka lapho wadobha uphini walugongoda ngophini kabili ekhanda lwafa khonapho.
“Ekwenza lokhu abantwana ayebaxotshile babelunguze emnyango, bekubona konke lokhu.”
UAsst Insp Ngawagare uthe umsolwa esenze lokhu, wabuyela ekamelweni lapho okwakulabantwana eqonde ukuyalala.
“Omunye wabantwana watshela umetheswacala ukuthi bambonile ebulala usane. Umsolwa waqonqosela ukuba bengatsheli muntu ngodaba lolu ngoba ezababulala.”
Kubikwa ngelanga elilandelayo wathatha isidumbu sosane ayesigoqele epulastikini, wathatha lekhuba waya egangeni lapho afika wagebha, wasigqibela khona.
Amapholisa athola ucingo lusuka komunye umfakazi mhlaka 4 Mpalakazi, ngodaba lolu.
Amapholisa athi edingisisa, athola ukuthi liqiniso, umetheswacala wasephathisa amapholisa, kwatholakala lalapho agqibela khona usane.
“Umsolwa uphathisa amapholisa ngokuphenyisisa udaba lolu. Sithanda ukubonga uzulu ngokuqhubeka ephathisa ngokuletha imbiko. Uzulu uxwayiswa ukuba ahloniphe impilo,” kutsho uAsst Insp Ngawagare.
