uMthunywa
YiNthatheli kaMthunywa
ABADLALI beHighlanders uBrian Banda loTinashe Makanda kubikwa sebenze izivumelwano zokuthi bayedlalela intshatshu zeCastle Lager Premier League iFC Platinum.
UBanda, owaziwa ngelokuthi BB ubesenza kuhle edlala esesiswini njalo uMakanda ngumgadli olodumo ohlohlele Amahlolanyama ngobungcitshi obukhulu ngomnyaka odluleyo.
Kubikwa izivumelwano zabo zomsebenzi leHighlanders zaphela kunyanga edluleyo.
Brian Banda
Ongathandanga ukuthi ibizo lakhe lichazwe wazise iphephandaba likazulu ukuthi ubudlelwano bukaBanda loMakanda lezimbamgodi zeFC Platinum buzabekwa emthethweni ngemva kokuba iZifa inike izeluleko ngokuhamba kwabadlali ngisikhathi seCovid-19.
“UMakanda loBanda sebesiya kuFC Platinum. Sebelobelane phansi leFC Platinum njalo iqembu leBosso selilahlekelwe,” kutsho oncwebe indlebe uMthunywa.
Kuqembu leFC Platinum, abadlali laba bobabili bazabuya bahlangane lowayengumqeqetshi weBosso uHendrick Pieter de Jongh.
Omunye umdlali olodumo uDenzel Khumalo, watshiya iBosso waya kuFC Platinum ekuqaleni komnyaka.
