uMthunywa
Thokozile Mbedzi
AMAPHOLISA koBulawayo abika ukuba asebophe indoda eyatshontsha imota yenkampani efundisa ukutshayela izimota.
Kubikwa uRussel Zwane oleminyaka engu-43 yokuzalwa, ohlala elokitshini le-Old Luveve weba iroli yohlobo lwe-Mercedec Benz mhlaka 23 Ncwabakazi ngehola lesibili ekuseni. Imota le yayimiswe lapho okugcinwa khona izimota ku-6th Avenue.
UZwane kuthiwa wangena ehofisini yalindawo, okugcinwa khona amakhiye ezimota zenkampani le. Kubikwa ngokuya kwesikhathi, unogada wananzelela wasemlandela uZwane wamtshela ukuthi uthunywe ngumnikazi wemota.
Esebona ukuthi usebanjiwe, uZwane kuthiwa wabaleka etshayela imota le ayeseyitshontshile ngesiqubu. Wabanjwa ngelanga elilandelayo ephakathi kwemota le esemgwaqweni ka12th Avenue.
Isikhulumi samapholisa koBulawayo u-lnspector Abednico Ncube uthe isandla somthetho simfinyelele uZwane.
“URussel wafika wantshungubala, wangena ngesikhala egumeni le-Car park eku-6th Avenue, wangena lapho okugcinwa khona amakhiye ezimota.
“Unogada obesemsebenzini wasebona kulomuntu emoteni wambuza ukuba kungani esemoteni, uRussel waphendula wathi uthunywe ngumnikazi wemota ukuba ayethatha imota zonke ezise-Car Park le,” kutsho u-Insp Ncube.
“Umsolwa wabaleka lemota yohlobo lwe-Mercedes Benz Atego 7 tonne truck yesinye sezikolo zokutshayela edolobheni lako Bulawayo. Ekubalekeni kwakhe uRussel watshayela imota le ehamba ngomgwaqo ka-Robert Mugabe Way. Umsolwa watholakala lemota le eme ku-12th Avenue.”
