uMthunywa
Thokozile Mbedzi
KUDABA okunathiswana ngalo itiye esigabeni seChireya eGokwe, kulomalukazana osakhulayo oveze ukuthi usana alalo ngumntakayisezala abalobudlelwano obutshisayo, uMthunywa uyakuveza lokhu lamhlanje.
Umalukazana lo, uAgnes Mushava uthe yena lobabazala wakhe okungasatholakalanga igama lakhe, ozala umkakhe, bayathandana njalo bahlala bonke ekhaya.
Kuzwakale ukuthi indaba le iphumele egcekeni ngesikhathi sokubonakala ukuthi umalukazana usezithwele njalo umkakhe esithi lowomthwalo kawazi nanko phela umkaMushava kahlali ekhaya, kodwa uhlala lapho asebenza khona.
Kubikwa uMushava wathi ebuzwa ngomthwalo lowu watshela umkakhe ukuthi umthwalo ngokayise okuyikho okwenza umkakhe wayabika indaba le kumlisa ophinde wayidlulisela enduneni.
Induna yakule indawo uChiya Chireya ubikele uMthunywa ukuthi wamukele indaba yendoda okubikwa izalise umalukazana wayo.
“Indaba le ilethwe edale lami isuka kumlisa njalo umalukazana lo uselosane. Kukhanya uMushava waba lobudlelwano loyisezala indaba le yaze yavela ngesikhathi sebonakala ezithwele.
“Umkakhe uthe ebona lokhu wabuza umkakhe ukuthi umthwalo ngokabani waveza ukuthi ngokayise.
“Indaba le sikhangelele ukuthi siyithonise kuviki ezayo ngeSonto lapho okuzabe kulobabazala, indodana yakhe kunye lomalukazana. Okwakhathesi sikhulume lomalukazana yena ovumileyo ukuthi ngempela wazaliswa nguyisezala umntwana amphethe ezandleni,” kutsho induna uChireya.
