uMthunywa
Thokozile Mbedzi
KUBE yisiphithiphithi izakhamizi zelokitshini leNkulumane koMunyoro ziphithizela zifuna ukubona isambane esithutshe kule indawo sixotshaniswa ngenye inyanga.
Isambane lesi esibonakale kumaviki amabili edluleyo sicine sibulewe sathathwa yinyanga le okubikwa yasuka isixotshanisa elokitshini leMbundane.
Esintwini isambane sikholelwa ukuba sigadwa ngabathakathi.
Kuvidiyo esezandleni zikaMthunywa kubonakala inyanga ithwele isambane lesi lomunye umuntu izakhamizi zibuza ukuthi isisa ngaphi, isambane sesifile.
Ekhuluma lentatheli kaMthunywa uKhansila weNkulumane uRodney Jele wakuWadi 22 uveze ukuthi lokhu kwenzakala kuWadi 23 kodwa laye wafika lapho esabulawelwa khona.
“Mina ngafika lapho okwenzakala isiga lesi kodwa ngafica isambane sesithwelwe singasekho kodwa lendlu lapho esafela khona ngayibona. Isambane lesi bathi savelela endaweni zeMbundane sigijima ngesiqubu esikhulu sixotshaniswa kungakho sithe sesibulewe kabazange baphozise amaseko bahle basithwala ngokuphazima kwelihlo basifaka emoteni yabo bahamba.
“Mina okunye okwalandelayo ngemva kwalokho angikwazi ngoba lami ngazifikela nje ngoba kayisiyo ndawo ekhangelwe yimi. Izinto ezinje ziyethusa uzulu ngoba umuntu uyabe esisa nga isambane kubangela ukungahlaliseki,” kulandisa uKhansila Jele.
UMphathi wedale lephalamende uKucaca Ivumile Phulu uxwayise izakhamizi ukuthi zingethuki ukubona inyamazana zeganga ngoba khathesi izulu seliqalisile ukuna kungakho inyamazana ezihlala zicatshile embalwini seziphuma.
“Ngizakhulumisana labeNational Parks ukuthi bafike lapha bazofundisa izakhamizi ngenyamazana zeganga. Indawo yethu ingcelelane leganga kungakho kuyenzakala ukuthi inyamazana zendle zithutshe ebantwini. Ngikhuthaza abantu ukuthi bangabulali inyamazana lezi,” kuphetha uMhlonitshwa uPhulu.
