uMthunywa
Ncekwenhle Ncube
UMDLALI olomfutho njalo osakhulayo uAdrian Silla usexwayise iqembu leNgezi Platinum ukuthi libophe ziqine ngoba kule impelaviki kuzatshitsha ufudu enkundleni yeBarbourfields lapho abazadibana khona kumidlalo yeligi.
Inkunzi lezi zombili zizathobelana ngeSonto eMagumeni lapho ezizapheqana kukhanye ehlulwayo.
USilla ubikele intatheli ukuthi kethuki lutho ngeqembu leNgezi Platinum njalo bazenza noma yini esemandleni abo ukuthi bayinqobe.
“Iqembu leHighlanders ngelezwe lonke ngakho thina akulaqembu elingama endleleni yethu. Lokhu sizakugcwalisa ngeSonto eMagumeni lapho esizathunqisa khona iNgezi Platinum bebuyele betshotshobele.
“Siyazi sibili liqembu elande ukusihlupha kodwa lonyaka sitshintsha unyawo. Iqembu lethu liqinile yonke indawo kanti labalandeli bethu basiphethe sibili. Akulanto engasimisa ukuthi sibavivinye ngeSonto.
“Abalandeli beqembu sifisa ukuthi bebuye ngobunengi babo bezogcwalisa inkundla bebone iqembu lisenza izimanga,” kutsho uSilla.
Intatheli ixoxisane labalandeli beqembu leBosso abathe bayiwomele iNgezi njalo bafisa ukuphindisela ngoba yande ukuba luhlupho nxa bedibana layo.
“Liqembu esithi nxa sidibana lalo kutshise phansi kuqande phezulu kodwa kule iviki silethemba lokuthi bazaphuma bebihla.
“Indlela iqembu lethu elikhanya selidlala ngayo kuvele kube mhlophe ukuthi inkomitsho lonyaka akuthandabuzwa ngeyethu,” kutsho uMthembo.
“Umqeqetshi kumele abophe ziqine ngoba iqembu leNgezi liqine kakhulu emuva ngakho balakho ukusebenzisa amabhola amade langananzeleleki lula kodwa noma kunjalo sikhangele ukuthi siphume sigave amakleza,” kutsho omunye umlandeli othande ukwaziwa ngokuthi ngu-Ezinkulu Wellaz.
Iqembu leHighlanders selidlale imidlalo emithathu lapho elanqoba kwemibili ladliwa kowodwa, kanti-ke iqembu leNgezi lona selidlale imidlalo emine lapho elinqobe kwemithathu ladliwa kowokucina yiYadah FC.
