uMthunywa
Indawo ngendawo idume ngomcebo ovela kuMdali, iBinga yaziwa ngenhlanzi, iGokwe ngotshinda, iGwanda yona ke idume ngezifuyo ezinengi ikakhulu inkomo, imbuzi lezimvu, ngitsho sibi sabobabhemi.
Ziduma ebusuku lemini imota ezithwala imbuzi lenkomo ezithengiweyo. Amasela ezifuyo bahle babona kulicebo elihle ukuthi banothe ngokutshontshela izakhamizi inkomo lembuzi bencedisana lamanye amapholisa angesabi ukungcolisa lolu gatsha lukaHulumende olwenza umsebenzi omuhle wokulondoloza umthetho.
Akhona amanye amapholisa aphathisana lamasela ngokubenzela amaphepha omgunyathi okuhambisa izifuyo, ukuthi kukhanye angani yilokhu abathi ngolimi lwabondlebe zikhanyilanga yi-genuine clearance form.
Zingavele zibe lalezi ncwadi zihamba lula izifuyo, uzadinga uze utshone inyawo esiswini sezithwale zayabulawa ezilaheni zemadolobheni zasiwa emabhutsha.
Kukanengi bebanjwa abanye bakhona amapholisa kodwa abadeli. Izakhamizi kuzigaba ezinengi zeGwanda zahlala phansi zaba yimbumba ngamaqembu atshiyeneyo ngoba baligaxa, baletshatha ijogwe lokuvikela imfuyo yabo bephathisana lamanye amapholisa esingathi bayizitsha ezinhle.
Bakhona abathi noma izakhamizi zisiya mangala icala lokutshotshelwa ufice eholoba njengamanzi kahololo abaselwe ngenkuni zombondo ehalada umamangala, ame lesela atheneke amandla umuntu. Ngenxa yokuthi zazingatholi uxhaso izakhamizi kwamanye amapholisa esingathi ngama “bad apples” yikho kwabunjwa okuthiwa nguMphatho oncedisana lamapholisa ukudinga amasela.
Bazama abanye bakhona ukugcona amaqembu lawa sokungani aphonguhamba etshaya abantu abangonanga lutho, basebenzise labanye onozindaba ukuthi babhale bangcolise umsebenzi omuhle owenziwa yikusebenzelana kwezakhamizi bengazange becwayisise bezwe kunhlangothi zonke zombili lamanye amapholisa angakwaziyo ubuhlungu bokutshontshelwa isifuyo sona esiyindikimba empilweni yomuntu onsundu ngoba kuyilo ibhanga lakhe.
Kwesinye isikhathi ufica abanye bakhona uqeda ukumangala ahle afonele isela ukuthi kolozibani banyane ozomangala ukuthi lokuthi uthole sokulokhophe phakathi kwesela lesakhamuzi, phela izifuyo yizo okufundiswa ngazo abantwana, lokubaselela, pho nxa uzaphatheka usekele umuntu otshontshayo uyabe ubulala ikusasa labantwana abangaba ngamadokotela bakujuje ijekiseni usugula.
Kwathi sokubunjwe lawa amaqembu ngezigaba ngezigaba sokulobubelo sebelala behle ngoba nxa isela libanjwa kujuluka umsisila endodeni ngoba liyancwetshwa kancane ikakhulu nxa liphika into esegcekeni, andubana lingakayinikezwa emapholiseni, liyawukhomba umuzi olotshwala.
Yikho ngakini lina elizintakubomvu ezibolileyo lingasixabanisi labafowethu abangamasela, njalo izakhamizi azibazondi ziyabe zifuna bakwazi ukuthi indoda idla amandla ayo hatshi ukuhwitha imfuyo yabantu okomzwazwa.
Ayixabene.
Umlobi ungamthinta ku: 0714355641
