uMthunywa
Nkosilathi Sibanda
HIGHLANDER heyi, ekaMatshobana, ekaMzilikazi, yiBosso!
Bonke abalandeli beqembu lenguqu iHighlanders bayazi ukuthi umutsho lo uyingoma eyayithandwa nguNdumiso Gumede, umongameli weqembu owedlula emhlabeni mhlaka 29 Mpalakazi ngo-2021.
Sekwedlule umnyaka uGumede etshonile, kodwa ulokhe ekhunjulwa ngemisebenzi emihle ayenza kuBosso engumdlali, engumkhokheli wayo njalo.
Iphephandaba likazulu libuyela muva ngalesikhathi, lihlanganela labathandi labalandeli bomdlalo kanobhutshuzwayo ngokukhumbula uGumede.
Le kwakuyindoda eyayithandwa linengi, nanko ukwedlula kwakhe emhlabeni kwadabula inhliziyo ilizwe lonke.
Ngaleli langa, uGumede, owayedume ngelithi “Gumz” waya ezweni labokhokho, watshiya iyezi elimnyama emdlalweni.
UGumede ukhunjulwa kakhulukazi ngokuba ngumkhokheli owafikisa iHighlanders kuzinga laphezulu, yaze yanconywa yiFifa.
Ngenxa kaGumede, iHighlanders yathenga iClub House, ihofisi lendlu yokugcina abadlali ebizwa ngokuthi yi-Hotel California, eselokitshini leLuveve.
Akulamkhokheli owake wakwenza lokhu kumbali yeBosso.
Kungxoxo yakhe lentatheli kaMthunywa mhlaka 22 Mpalakazi ngomnyaka odluleyo, uGumede waveza ukuba ikusasa yenguqu kumele iphathwe ngabasakhulayo.
Wayekhuluma kanje ngesikhathi esanda kutshiya isikhundla sokuba yinkokheli yeHighlanders. Mhla welanga lelo, kwakungumcimbi wokumbonga ngokuzinekela kwakhe kumdlalo wenguqu, ikakhulu kuHighlanders.
Wabika ukuthi sekuyisikhathi sokuthi abadala batshiyele abancane izikhundla.
Wabika angathi uyazi ukuthi usezakwedlula, esithi usezatshiyela inkokheli ezisacathula umsebenzi wokukhokhela inhlelo zemahofisini eqembu.
Ngemva kokusuka kukaGumede, ihofisi kamaqhuzu weHighlanders yabanjwa nguNhlanhla Bahlangene Dube, kwabuya njalo uRonald Moyo.
UGumede wake waphatha isikhundla kunhlanganiso yeZimbabwe Football Association.
Izikhulumi labasekeli beqembu leHighlanders abakhulume loMthunywa babike ngokudabuka inhliziyo ngokukhumbula uGumede ukuthi ukusuka kukaGumede kuzatshiya isikhala eqenjini.
“Asimkhohlwanga umdala. Siyamkhumbula,” kutsho umlandeli beHighlanders uChanke “Bosso” Dube.
USimanga Mthombeni olilunga leBosso ngokugcweleyo uthe uGumede ubeyinsika yolwazi.
Zimbabwe Football Association.
“Ubaba uGumede ubeyindoda emadodeni. Indoda esikhuluma ngayo ibithanda ibhola okwedlulisileyo ingumaqhuzu oqotho. Siyambonga ngomsebenzi awenzileyo lokusitshiya silolwazi olujulileyo ngezokukhokhelwa kwenguqu.”
Ebuzwa ukuthi yini ayikhumbula kakhulu ngempilo yakhe kunguqu, uGumede watshela iphephandaba likazulu ukuthi ukunqoba iDynamos kabili ngesizini ka-2016 kwamjabulisa kakhulu.
“Kanti kwakuzaphela nini ukuhlala sikhala ngokuthi iDynamos iyasinqoba? Ngakutsho ukuthi sekwanele. Ukunqoba ithimu le kwangijabulisa kakhulu.
“Abasekeli bethu abakhuze ithimu ngedlabuzane imihla yonke,” ngamazwi kamuyi uGumede la.
Umuyi waxwayisa abasekeli bethimu yezwe lonke ukuthi bahlale besazi ukuba ukunqoba ithimu eyodwa akutsho ukuthi umkhankaso wenkezo enkulu yeligi usuphelile.
