uMthunywa
Bloemfontein — Umthethwandaba kamantshi weBloemfontein ugwebe isangoma iminyaka elitshumi ngemva kokubotshelwa ukudlwengula ingane kuminyaka emithathu eyedlule, kutsho amapholisa aseFree State.
ULehlohonolo Mokhalo, 32, wadlwengula intombazana eleminyaka engu-16 ubudala ngesikhathi kuqhubeka umcimbi owawusedamini eVirginia mhlaka-18 Mabasa ngomnyaka odlule, kutsho okhulumela amapholisa u-Ikobeng Hlubi.
UMokhalo watshela abazali bale ntombazana ukuthi bayitshiye laye ngoba kulokungalungile ngayo.
“Kusolwa ukuthi umsolwa watshela isisulu ukuthi sangenwa ngutokoloshi (imimoya emibi) kanti iyodwa indlela yokuwukhipha, kwakufanele bahlangane emacansini layo, ngesikhathi le ntombazana inqaba umsolwa wayibamba ngenkani wayidlwengula,” kutsho uHlubi.
“Umamangala wabikela unina ngodaba wase ebotshwa uMakhalo.”
Kusenjalo kulendoda yeMbombela esolwa ngokuzama “ukuthwala” ngendodana yayo etshele inkantolo ukuthi selokhu yabotshwa ayikaze iwathole amaphilisi ayo.
Le ndoda lonkosikazi wayo abayizangoma bobabili basolwa ngokufuna ukutshisa babulale indodana yazo ziyenze umhlatshelo ukuze zizoceba eMatsulu.
Umakhelwane wezwa ingane ikhala ihayiza ibotshelwe eplangweni ngaphansi komlilo.
UCedric Mkhonto (29) lonkosikazi wakhe uNelly Jawuki (25) babotshwa mhlaka-16 Mfumfu ngemuva kokufunwa isikhathi eside baze batholakala eTonga eduzane laseMozambique.
“Angikaze ngiwathole amaphilisi ami selokhu ngabotshwa. Ngicela umthethwandaba yenze izinhlelo zokuthi ngithole amaphilisi ami esibhedlela saseTonga,” kutsho uMkhonto emthethwandaba kamantshi weMatsulu ngoLwesine.
