uMthunywa
Ethel Ncube
SEZIBEKE amaphika phansi izakhamizi zeMbembesi njalo sezizake zilale ubuthongo behle kulandela ukubanjwa kwesigelekeqe ebesesihluphile ngokudlwengula izalukazi.
Umsolwa owaziwa ngelokuthi Tawanda kodwa okungasatholakalanga isibongo sakhe osamelele isigwebo sakhe usejele eKhami.
Kubikwa umsolwa wadlwengula esinye isalukazi kumaviki ambalwa edluleyo kwathi ngelanga elilandelayo waya emzini waleso salukazi esiyazidingisa umsebenzi bahle bambamba okwabangela ukuthi abotshwe. UMthunywa uxhumane lesinye isakhamuzi sakule indawo uMnumzana Nkosi Ndaba oveze ukuba bafisa umthetho umnike isigwebo esimfaneleyo ngoba ubesedlisa isigaba sonke luklubhu.
“Ubaba lo (umsolwa) wabuya komunye umuzi wafika wabophela ubaba wakhona wagijima wayavulela ugogo ezilalele, ngenhlanhla lo owayebotshelwe wakhulula intambo ayebotshwe ngayo wagijima wayasiza ugogo lo.
“Umsolwa esehluleke ukufeza inhloso yakhe kazange adele kodwa waphinda wayangena komunye njalo umuzi wakomakhelwane wayangenela esinye isalukazi wafika wasidlwengula engabonwa muntu wasecela ezinyaweni.
“Kusisa umsolwa wabuyela emzini ayelele ehlupha kuwo esiyadinga umsebenzi esenzela ukubona ukuthi abantu bambonile yini ebusuku kanti wayengabuzanga elangeni.
“Uthe esithi qaqabu omunye wahle wathi unyawo lolu lufana lonyawo olungene komunye umuzi yilo kanye, wahle wabanjwa wahanjiswa emapholiseni,” kubika uMnu Ndaba .
Ekhuluma lentatheli uqhubekele phambili eveza ukuba bavule indlebe lamehlo ukuba bezwe ukuba ingalo yomthetho izamgweba okunganani.
“Sikhuluma khonapha usejele eKhami kodwa kakagwetshwa, ulinde ukuba abuyele emthethwandaba. Abantu bonke bathukuthele ngesenzo sesigebengu sokuhlukumeza ogogo abangelacala kafuni alingana labo. Ufuna ogogo kuphela.
“Sifisa ukuba agwetshwe angaphumi ejele ngoba uyingozi emphakathini, uphambanisa impilo zabantu. Nxa engaphuma engagwetshwanga kungaba nzima kakhulu,” kuphetha uMnu Ndaba.
