uMthunywa
Cornelius Luphahla
Kulomntwana wesigabeni seSiachilaba eBinga otshiye umthethwandaba weBinga ukhuza umhlola ngemva kokuba ekhale ezimathonsi ethi usekhulile usefuna ukwendela kwenye indoda ebisetheswa icala lokuya laye emacansini engumntwana omncane.
Umamangala oleminyaka (13) njalo oqede uGiredi 7 kuwonalo umnyaka ophelileyo ukhale wabubula ethi ufuna ukuhamba losomoya wakhe uPrince Mukombwe (26) ejele ofunyanwe elecala lokuhlangana laye emacansini engumntwana omncane.
Umtshutshisi uMnumzana Bruce Maphosa ubikele umthethwandaba ukuthi umsolwa wetheswa amacala amabili okudlwengula.
Kubikwa mhlaka 26 Mpalakazi nyakenye umsolwa wahlangana lomamangala ngakibo ebusuku. Ngemva kwalokho waphinda njalo mhlaka 1 kuyonale inyanga ngakibo kukamsolwa.
Kuzwakale ukuthi abazali bakamamangala bananzelela ukuba umntanabo kakho okwadala ukuba baqale ukumdinga baze bambona ekuseni. Bathi bembuza ukuthi ubengaphi wachaza ukuthi ubekuMukombwe okuyikho okwenza bayabikela amapholisa ahle ambopha.
Ebuzwa ngale indaba umsolwa kubikwa ulivumile icala lakhe wabuya njalo wathi uzimisele ukumthatha umamangala ngoba uyamthanda.
“Mhlonitshwa mina ngizimisele ukumthatha umamangala ngoba ngiyamthanda njalo angimbambanga iganyavu kodwa besithandana,” kutsho umsolwa.
Kubikwa ngemva kokuba umantshi ethese umsolwa isigwebo lesi umamangala ukhale wabubula ecela ukuba umantshi akhulule umsolwa ngoba bebethandana.
“Mhlonitshwa mina ngiyamthanda umkami ngakho bengicela ungamgwebi ngoba besithandana. Okunye njalo mina sengizimisele ukwendela kumamangala ngakho bengicela akhululwe,” kutsho umamangala.
Umantshi uNkosikazi Ailine Munamati ugwebe umsolwa ukuthi ayepika iminyaka engu-12 ukuze engaphindi enze icala elifanayo andubana athi kumamangala kabuyele esikolo ngoba usesemncinyane.
