uMthunywa
YiNtatheli kaMthunywa
UKUFUNDELA ukutshayela sekuzakuba lula ebantwini abanengi kuleli nanko phela uHulumende useyethule iHighway Code elotshwe ngolimi lweSiNdebele lolwesiShona.
Inyathelo leli likhangalelwe ukuthi lusekele uhlelo lukaHulumende lokuphakamisa umphakathi, kusondezwe bonke abantu duzane lengqubekela phambili.
Ekhuluma emhlanganweni wenkundla yeKhabhinethi ngoLwesibili ngeviki edluleyo, uMphathintambo wezokuxhumana, olwe- Information, Communication Technology, Posts and Courier Services, uDokotela Jenfan Muswere uthe: “Isizwe siyaziswa ukuthi kumizamo yokuthuthukisa umphakathi ngokuphakamisa lokusondeza wonke umuntu kungqubekela phambili, njengokutshiwo nguMongameli ukuthi kungatshiywa muntu loba ekuyiphi indawo emuva, uHulumende usethule iHighway Code elotshwe ngeSiNdebele lesiShona.
“Akekho ozavinjwa kusukela khathesi ukuthi afunde i-Highway Code, abesethola ichence lokutshayela ngenxa yokuvinjwa lulimi.”
Uthe iHighway Code yolimi lomdabu izatholakala lakuzifundo zokutshayela ezisebulenjini.