uMthunywa
Cornelius Luphahla
ZIPHAKATHI kwelitshe lembokodo izakhamizi zesiqintini seMfanyana, eNtabazinduna ngenxa yokuswelakala kwamanzi abantu lezifuyo osokubangela ukuthi izifuyo lazo zinathe amanzi ezititshi zengcekeza.
Ukuswelakala kwamanzi kule indawo kuqale ngemva kokugqibeleka kwedamu leMfanyana.
Lanxa izakhamizi lezi zibhekane lodubo lwamanzi seziqalisile ukugebha noma nje zingelamitshina.
UMthunywa uvakatshele kule indawo wakhulumisana loNkosazana Sibonisiwe Dube oyisakhamuzi sakule indawo othe izakhamizi zikubone kufanele ukuthi zivuselele idamu leli noma nje bengelampahla zokugebha.
“Njengoba sesilesikhathi eside siswela amanzi kule indawo sibone kungcono ukuthi sivuselele idamu lethu, iMfanyana ukuze izifuyo zethu zithole amanzi.
“Siqale ukugebha idamu leli emavikini amabili adluleyo njalo sikhangelele ukuthi kusiyaphela umnyaka sibe sesikhatshana ngokugebha lokhu.
“Okusikhathazayo yikuthi sigebha ngamafotsholo lamapiki kasila mitshina yokugebhisa lokukhipha inhlabathi. Lokhu kwenza umsebenzi wethu ubenzima njalo uthathe isikhathi eside,” kuveza uNkszn Dube.
UNkszn Dube uqhubekele phambili wachaza ukuthi abantu sebesikha amanzi khatshana.
“Uhlupho lwamanzi lolu kalukhathazi izifuyo zodwa kodwa lathi sihamba umango ongaba ngamakhilomitha afika ayisikhombisa sisiyakukha amanzi esibholaneni.
“Ezibholaneni lezi kuyabe kulabantu abanengi okudala ukuthi sihlale isikhathi eside silindele amanzi.
Ngakho nxa singancediswa ukugebha idamu leli kungaba ngcono ngoba sizabe sisikha khona amanzi ngaphandle kwawokunatha,” kutsho uNkszn Dube.
Ekhuluma lentatheli uMnumzana Crispen Mpofu oyisakhamuzi sakule indawo uchaze ukuthi nxa inkomo zabo zingasanathanga echibini lengcekeza zihamba umango omude kakhulu zisiya edamu leZimbili.
“Njengoba amanzi ezititshi edala imikhuhlane ezifuyweni kwesinye isikhathi izifuyo zethu sizinathisa edamu leZimbili elikhatshana okungaba ngamakhilomitha angu-15.
“Ukuhamba umango omude kwezifuyo zisiyanatha kudala ukuthi zicube ngoba ziphenduka sezidiniwe zingasadli kuhle utshani lanxa labo buvele bubulutshwana kule indawo,” kutsho uMnu Mpofu.
Usobhuku wakule indawo uMnumzana Judah Mpofu uchaze ukuthi bakhangelele ukuthi idamu labo lingaphela ukugejwa libe lamanzi bazasungula amaphurojekithi atshiyeneyo kwezokulima.
“Nxa singathola abangasincedisa ukugebha idamu lethu sikhangelele ukuthi sisungule amaphurojekithi atshiyeneyo kwezokulima ukuze sithuthuke sibuye sithuthukise lesigaba sethu.
“Indawo yethu ivundile yikho nje sisithi singaba ledamu silakho ukuthi silime izilimo ezehlukeneyo sizithuthukise,” kutsho uMnu Mpofu.
UKhansila wakule indawo uMnumzana Bekithemba Qongo uchaze ukuthi sebeveze isifiso sabo kuHulumende kanye lenhlanganiso ezizimele zodwa ukuze bathole uncedo ekugebheni idamu labo.
“Njengoba sihlupheka kangaka ngokuswela amanzi isifiso sethu yikuthi ngabe uHulumende uyasincedisa kanye lenhlanganiso ezizimeleyo ngemitshina njengoba thina sivele sesiqalisile ukugebha idamu lethu ngezandla.
“Sengicele uncedo enhlanganisweni ezehlukeneyo kodwa kangikalutholi ngakho lokhe ngisaqhubeka ngidinga usizo lokugejelwa idamu lethu.
Ngilethemba lokuthi lingagejwa isigaba sethu sizathuthuka kakhulu,” kuphetha uKhansila uQongo.
