uMthunywa
Mehleli Dube
NGIYOGIBELA ngomso, le yinkulumo ejwayelekileyo nxa kusanda kudlula usuku lweKhisimusi kumbe ikhefu lePhasika.
Zinengi izizalwane zakuleli ezisabalele amagumbini wonke womane eSouth Africa. Abanye bahamba umthutha khaya, alobe, adliwe zindunduma umuntu, akhohlwe ukuthi emuva utshiye unkosikazi labantwana.
Abanye njalo ngabathumela indingeko zomdeni kodwa bengabuyi kuze kuphele umnyaka bevika ngokuthi lapho abasebenza khona bayancitshwa amalanga okuphumula. Kanengi kungasiqiniso lelo, umuntu edliwa zindunduma.
Okubuhlungu yikuthi unkosikazi wakho ngumthombo wothando oyabe ugobhoza emini lebusuku, pho uyabusithi anathwa ngubani lawomanzi. Bayaqinisela abantwana babantu kodwa ngenxa yokuthi isikhathi siba side ungezi ekhaya kwesinye isikhathi umalele lokuthi akuvakatshele, ucina laye ekhulelwa yimizwa acine enathisa abanye amanzi akho.
Ukhohlwe ukuthi ngapho wena uyabe unatha emhlambini ukuze ungabulawa liphango. Bayaqinisela uze ubazwele omakoti babantu, phela bona abakasapho lukaEva abalutho ukuhlekana lapho sokuyiwadingwa amanzi ezibholaneni, uzwe kuthiwa “awubonanga esephonguhlekelela umfundisi, kade indoda yahamba, sengathi usejele”.
Ungaze uthumele amaqubaquba emali lokudla wena ungabuyi ekhaya ukuzothambisa umphimbo wenkanuko zemizwa, akusizi lutho. Yikho okucina kubangela ukuthi uzwe sekuthiwa umalukazana wakozimbece uyawula, umthombo wothando lemvelo uyabusugcwele uphuphuma, kuswelakale wena ukuthi uhabule amankomitsho amabili amathathu ugobhoze kakutsha.
Abanye ngabahamba bafulathele bakhohlwe konke labantwana, kodwa befika eGoli bazitholele osisi Rozi lapho abayabe benatha khona. Kuvamile ukuthi sizwe emisakazweni sikubale njalo lakumaphephandaba ukuthi kulenjiva ebuye yabulala umkayo okade esejola, kodwa akhohlwe ukuthi imbangela nguye uqobo lwakhe ngokungabuyi ekhaya ngesikhathi.
Kambe umqando ungaka aqinisele lize liyesewula, hayi bo ndoda woza ekhaya amanzi akho engakadungwa yizilo zasendle.
Ayixabene.
Umlobi uthinteka kunombolo ezithi 0714355641.
