uMthunywa
Mehleli Dube
BAKHONA abantu abathanda ukunyeya, baze banyeye sibili sesidumbu, umuntu esethe thwitshi ebhokisini.
Ngesikhathi kusenziwa ibhodiviyu bagijima babe yibo abakuqala ukubona isidumbu, besenzela phela ukuthi nxa sebezishwashwatha, bazithathe la bazise le.
Uzwa bethi ubesecake, esemnyama, kambe umuntu ogulayo angazimuka athini ngoba phela lokudla kuyabe kuyimbambangamandla ngoba efuthelwa umuntu, yiyo imbangela yokuthi umuntu azace, phela lokugeza uyabe esehluleka kwesinye isikhathi kusweleke lomuntu ongamgezisa, uthole umuntu eseze elengcino.
Inkinga ekhona yikuthi angazi ukuthi abantu bezwa ngobani ukuthi umuntu angazaca uyabe selegcikwane lesifo sikanogawulayo.
Abaziyo bathi umkhuhlane lo wande ukumemetheka, uthelelwane ngokuhlangana kowesilisa lowesifazana kwezocansi.
Into engifuna ubeyazi mhlobo wami yikuthi akusibo bonke abathola lumkhuhlane ngokufeba.
Bakhona abawuphathelwa ngomkabo kumbe ngokungaziphathi komunye abezwana laye.
Wawuzwe ngemva kokwenza ibhodiviyu, uzwe esefeketha umuntu ethi umufi wayethanda izidwaba loba nje ubengamqondisisi esebone ukuba mathambothambo ahle ayifake ngeyakhe indlela, ezakwenza ukuthi nxa esechathekela akade bengekho emngcwabeni bajinge bakholwe, ufice umuntu wakhona engasacwayizi eselandisa ngoba engafuni kuphazanyiswa.
Abanye baze beqele ngale kukaGwembe bebhodiviywa lesidumbu somuntu abangazange bambone engohamba ngezakhe ezimbili emhlabeni, kodwa ufice sebeqinise imidlambulo begijimela ukuyabona umuntu abangamaziyo, yikho okuthiwa yikuphambana-ke lokhu kumbe sithi wadla amasi akoninazala, akasazenzi.
Musani ukungena kundwendwe zokubona isidumbu elingasaziyo lichithela abadatshukelweyo isikhathi ngoba izinhliziyo zabo zikhala ezimathonsi ngokulahlekelwa ngelinye lelunga lomdeni.
Ayixabene.
Umlobi uthinteka ku0714355641
