uMthunywa
Mehleli Dube
KUKANENGI sibona abantu bedala amacala, baphunyuke ngoba sekudingwe abameli labafakazi bamanga, kwesinye isikhathi kusenziwa yikuthi umuntu uyabe elezimali zakhe, abenguphunyuka bemphethe.
Abaziyo ngezomthetho bathi ungabona umuntu edinga amagqwetha yazi ukuthi kukhona okutshaya amanzi. Phela ngolimi lwabondlebe zikhanyilanga bathi “the truth needs no support”.
Kwakuthi umuntu amagqwetha akhe esemhlangule emlonyeni wengwenya, athabe abemanzi te, kwesinye isikhathi kuhlatshwe kujatshulelwa ukuthi unqobile wasinda.
Bakhona abadala insindabaphenduli lempicabadala yamacala afana lokubulala, kodwa ngenxa yokuthi balezimali bangagwetshelwa ntambo, babupheke ubufakazi, basinde.
Uluntu lusuka lukhohlwe nje ukuthi ungaze uphunyuke kangaki kodwa ujaji omkhulu ngunembeza wakho, uzahlala ekuthonisela uze uyekogoqwanyawo, mhlawumbe kuze kukubangele lemikhuhlane yenhliziyo lobuthongo ungasabuquthi, ontanga ngolimi lwabo abazikhandela lona bathi kuyabe kuphambana amawatshi engqondweni.
Omunye uthole lokudla engasadli ngoba edliwa yisazela kuthundubaze inhliziyo yakhe, aphele umuntu abengucigo sengathi ngumuntu oyekele ukunatha amaphilisi esifo sikanogawulayo ngabomu.
Abanye njalo baze babelamalalo amabi alale ewumana uthole eseginqe lengubo sezimanzi sekungani zikhizelwe yimbozisamahlanga kaNcwabakazi.
Uyabe usuzidalele umkhuhlane abathi ngesilungu somnambulism. Kubalulekile ukuthi nxa uthe wadala umlandu, xolisa uhlabe phansi ngedolo ucele intethelelo, laye omoneleyo nxa engumuntu ukuthukuthela kuzakwehla, mhlawumbe akuhlawulise, kube yikuphela kokhophe liphile kamnandi, lawe uzizwe utshaywa ngumoya.
Labafundisi bayatsho ukuthi unembeza ongela sici ukusondeza duze kukaMvelinqangi ngoba ucela loba yini kuye ungela ntandabuzo njalo ulethemba.
Ungadala amacala uthembe ukuthi ulezimali, isiphetho nguwe ngoba ucina uthenga izidakamizwa uzama ukuthundubaza ingqondo ukuthi iphume kulokhu kucabanga, kucine kukubangela imikhuhlane yamaphaphu.
Ayixabene.
Dube 0714355641
