uMthunywa
Cornelius Luphahla
Sizwe sikaMthwakazi laphila ngezinyembezi legazi kulenzinsuku kutheni? Kungeneni esizweni esasidume ngokuthula lokubambana okunjeya? Yiphi le mpukane esiwone loluchango olunguMthwakazi? Osehlanyele ubunke lobu koMthwakazi ngubani?
Bakwethu ngikhuluma nje kangihlayazi ngoba sonke sikukhangele ukuthi sebephelile abantu ngenxa yobudlwangudlwangu osobulapha. Ababulali babuzwa lapha, amasela abuzwa lapha, abadlovayo babuzwa lapha njalo, kanye labakhunkuli sebebuzwa khonapha.
Awu, kungani livumela ububi lobu busanda lapha koMthwakazi bakwethu?
Khathesi khona ngilusizi njengoba kuzinsuku zeKhisimusi ngoba bazaphela abantu befela izinto ezingaqedakaliyo.
Abantwana bakhathesi umuntu bambona njengesibungu ongasicobodisa kungabi ndaba zalutho.
Njengemadolobheni khona angikhulumi, kukompunzi idla emini kaGqalaza. Angazi ukuthi moya bani ophefumulwa emadolobheni odala ubunke lobu.
Sifikile-ke iKhisimusi bakwethu, lingavukelani kodwa yazini ukuthi wonke umuntu uyakufuna ukujabula kakho ofuna ukufa. Ngakho masela ake liphumuze abantu labo bazikholisela emhlabeni kaMvelinqangi.
Sebenzani okwenu litshiye ukuvukela abantu libabulala libathathela abakusebenzileyo. Kanti kungani lifuna ukudla mahala njengedlozi? Kalibona yini ukuthi lingcolisa uMthwakazi ngobubi benu?
Bakwethu ukuqedana lokhu akutsho ukubhukudana libulalane kuphela kodwa ngitsho lokuyengana kubontanga okuyikho ukugijimela embizeni yomhiqo ixhwatha eziko. Lapha ngichaza ukuthi bontanga njengoba khathesi kuyisikhathi seKhisimusi yazini ukuthi kubalulekile ukuthi lingadonselani ebubini. Ngiyazi inengi lenu selihlelile imidlalo le ethiwa ngama-vuzu party lapho elenza khona ububi.
Nanzelela-ke jaha kulowomdlalo ungaphethanga uzibulele ngokuthola ingculazi. Nanzelela lawe ntombi ungaphethi suzithwele umthwalo ongaziwayo wabuya wamukela ingculazi njalo.
Injalo impilo, angithi usiba lwenkukhu yikubhebha nje? Kunjalo ke lakumahlongandlebe, aphetha ngokuthola umvuzo wobubi.
Lapha ngizama ukulixwayisa lani bontanga ukuba lingaze laqedana ngezenzo zenu ezimbi ezingcolisa uMthwakazi.
Yebo kambe ukujabula akwalelwa muntu kodwa jabulani kusasemini ngoba ubusuku ngobokulala njalo buhanjwa ngabakhunkuli.
Into esuka njalo ingidanise lapha koMthwakazi yikuthi abakhunkuli labo kabadeli baqhubekela phambili ngobubi babo. Uthola kuthiwa umuntu utshaywe ngondofa wahle wafa asazi ukuthi abafuya ondofa laba basuka bangenwe yini.
Thina sikhalela ukwanda lapha koMthwakazi bona balwa lokwanda. Babengahlayazi sibili oNdukuzibomvu amajaha omkhonto nxa babethi ukwanda kwaliwa ngabathakathi. Nanku sikubona ngamehlo ethu la.
BakaMthwakazi, ake lifunde ukuzwelana liphathane ngomusa njengokwakusenziwa ngokhokho. Yekelani ukubulalana, kanti nxa libulalana kanje lifuna kuphethe ngani? Vuselelani ubuntu benu bakwethu libambane lidele ububi lobunke lobu beselibuvuka libe munye.
